Wir fridrich von gotes genaden Pfallenczgraf by Rein vnd Herczog in Beyern etc. Bechennen vnd tu^on chunt offenlichen mit disem bri^ef, Das wir fu^er vns selb, vnd fur die Hochgeborn Stephann vnd Johannsen Pfallenczgrafen by Rein vnd Herczogen in Beyern vnser lieb bru^eder gen dem Hochgeborn vnserm¹⁾ herczog Albrechten Herczog zu O^esterreich, ze Steyer, ze Kärnden vnd ze Krain, graf ze Tyrol etc. verpunden haben vnd verpinden auch wissentlichen mit disem bri^efe, Was er Graf Heinreichen von Schawnberg jn disem chri^eg, den er ieczo mit im hat, seiner Vesten oder geslossen, Ma^erkcht oder Do^erffer, angewinnt Vnd jn sein gewalt bringt, das wir dagegen dem selben vnserm lieben O^ehem Herczog albrechten sten vnd beleiben sullen vnd Wellen jn sölicher Puntnusse vnd freuntschaft, als wir paidenthalben vns gen ein ander verschriben haben mit vnsern Landen zu nidern Beyern vnd mit seinem Land Osterreich vnd ob der Ens nach laut der bri^efe, di wir daru^eber gen ein ander geben haben. Mit vrchund dicz bri^efs geben zu Ried an freytag vor sand Pangra^eczen tag, Nach kristes gepu^ertt drewczehen hundert jarn, darnach jn dem Achczgisten Jare.

Source Fulltext: OÖUB 9 (Wien 1906), S. 848-849