Ich Härtel der Snaitpekch vnd ich Mendel Swellenpekch vergehen mit dem bryf offenbar allen lewten icz lebentigen vnd hernach chunftigen, den er furbracht vnd geczaigt wirt, vmb die tatt, die wir tan haben, dar vmb wir in des erbern herren hern Reimprechs von Walsse die zeit haubtman ob der Enns venchnuzz chomen waren, aus der selben venchnüzz vns erber herren ritter vnd chnecht vnd vnserr frewnt erpeten haben in der mazz als hernach verschriben stet, das wir noch ze einer pessrung vnserm obgenanten herren von Walsse, vnser iglicher mit sein selbs leib, ain moneyd dienen sollen, mit alle die vnd zu zwain spiessen gehört, an sold vnd auf vnser selbs chost, vnd sollen das tun, wann er vnser iecz in dem gegenwirtigen jar bedurffund sey. Darnach loben verhaissen vnd versprechen mer, daz wir gen dem obgenantem vnserm herren von Wallsee vnd allen den seinen vnd gen allen den, die mit wort vnd mit werchen an vnser venchnuzz schuld haben, dhain veintschaft hass noch vnwillen tragen, wir noch ander iemand, von vnsern wegen niemand dhainen schaden zu ziechen noch trachten sollen vil noch wenig dhainerlay weis an geuerd. Darczu sollen wir hin für wider den hochgeborn fürsten den herczogen von Osterreich noch wider di von Walsse noch die iren noch wider das land ze Osterreich niderhalb vnd oberhalb der Enns in dhainen wegen nichts tun, ez sey denn mit dem rechten, aber von der venchnuzz vnd tatt wegen sollen wir mit recht noch an recht mit niemand nichts ze schaffen haben. Der vorgeschriben gelub vnd puntt stet ze haben haben wir hincz Got vnd allen seinen heiligen starch ayd gesworen also, das wir die gehais genczlich vnd vnuerucht vnd an all arig liste stet haben wellen. Wer aber, das wir paid oder vnder vnns ainer, welicher der wer, oder von vnsern wegen iemand das indert vberfur, dez man für warhait mit zwain piderben mann vberweist wurd, so sein wir oder welicher vnder vns das vberfert, veruallen leibs vnd guts an alle gnad vnd mag man denn mit vns paiden, ob wir es paid verschulden oder welicher vnder vns daz verschuld, mit dez leib vnd gut tun, wie dew obgenanten herren von Osterreich vnd die von Walsse verlust vnd bedarff man denn ander rechten nicht, denn mit dem bryef sullen wir gevertig werden, ob wir es also verschulden, alz vor geschriben stet, vnd sol vns denn wider sy niemant halden; wer es dar vber tett, der tett wider sein er vnd trew vnd wider das recht. Vnd der vorgeschriben gelüb vnd pünt geben wir ze scheinberr guter gedächtnuzz den bryf besigelt mit mein egenants Härtleins des Snaitpekchen insigel vnd mit meins lieben pruder Petern des Snaitpekchen insigel. Wann ich Mändel Swellenpekch aigens insigel die zeit nicht enhet, hab ich gepeten den erbern Ruegern den Tawrner vnd Nyclasen den Dossen, des chnecht ich die zeit gewesen pin, das ich durch meiner vlizzigen pet willen ir insigel zu einer zewgnuss an den bryf gelegt habent, in an schaden, dar vnder ich mich verpint das stät ze haben, das vor an dem bryf geschriben vnd begriffen ist, der geben ist ze Lincz des Sunntags ze Mitervasten, do man zalt von Christes gepurt drewzehen hundert iar, darnach in dem ains vnd achczigisten iar.

Source Fulltext: OÖUB 10 (Wien 1933), S. 25-26