Wir Albrecht etc. embieten vnserm getrewn liebn Otten von Zelking von Schönnekk vnser gnad vnd allez gut. Wir lazzen dich wizzen, daz zwischen vns vnd graf Hainreichen von Schavenberg getaidingt ist, daz wir vnser stözze hinder spruchleut gangen sein vnd sind darauf ze widerwett geseczet zwelif tausent phunt phenning also, ob wir des spruchs vnd der taiding auzgiengen, so sullen wir im auf die nachsten Sonwenden geben zweliftausen phunt phenning; teten wir des nicht, so sol er losen vnser vesten vnd herschaft ze Newmburg auf dem In mit aller zugehörung, als die dein sacz von vns ist, also, daz er die egenanten zwelif tausent phunt phenning darauf haben sol vnd darzu das gelt, darumb er das von dir löset nach deiner saczbrief sag vnd sullen auch wir die weil nicht losung tun, vncz zwischen vns ausgesprochen wird. Da von so schaffen wir mit dir ernstlich mit disem brief, ob das wer, daz wir der taiding vnd des spruchs auzgiengen vnd in auch der egenanten zweliftausent phunt auf die Sunwenden nicht auzrichteten, daz du im denn mit losung der egenanten vnser vest vnd herschaft mit aller zugehörung, als dir die stet, gehorsam seist, wenne er die an dich vordert, zu gleicher weis als vns selber vnd daz du im auch das deinen offenn brief gebest mit deinem anhangenden jnsigel versigelt, als wir dir den geschriben mit sampt disem brief senden, wo das also getaidingt ist, vnd hat er vns auch in solicher mazze vmb zwelif tausent phunt geweiset auf die vesten, die im von dem gotshaus ze Pazzow stent, vnd da habent vns sein purggrafen auch ze gleicher weis solich brief geben mit iren insigeln versigelt. Ob auch das also ze schulden kumt vnd du im den egenanten deinen sacz ze Nevmburg ze lösen geist, so sagen wir dich desselben saczes vnd aller der punde, der du vns damit schuldig pist, ledig vnd los. Mit vrkund dicz briefs, geben ze Wienn an sand Dorotheetag anno etc. LXXX primo.

Source Fulltext: OÖUB 10 (Wien 1933), S. 16-17