Wir Fridrich von Gots gnaden pfallenczgrafe bey Rein vnd herczog in Bayern etc. bekennen vnd tun kunt vmb alle die krieg vnd stözze, die da sind zwischen dem hochgebornen fursten vnserm lieben Österreich etc. an ainem tail vnd zwischen vns an dem andern tail von graf Hainreichs wegen von Schawnberg, als dieselben krieg vnd stözze vormals begriffen sind in den anlaz priefen, die der hochgeborn purggraf Fridrich von Nürnberg, vnser lieber swager, vnd der edel vnd wolgeborn lantgraf Johans vom Leuthemberg czwischen vns nv nechst gemachet vnd die wir daruber gegeben haben, daz wir derselben stözze vnd missehellung genczleichen gegangen sein hinder den egenanten vnsern swager, also daz der egenant vnser öhem herczog Albrecht drey aus seinem rat vnd wir drey auz vnserm rate darczu geben sullen vnd die siben sullen zu einander komen gen Pazzaw auf den nechsten Suntag nach dem Obristen, der schierst chumpt, vnd die sullent zu peder seit verhören vnser prief vrchund vnd furgab vnd nach der verhörung sullen versuchen, ob si vns in der mynne freuntlichen berichten mugen mit vnser paider tail wissen vnd willen. Möchten si sich aber nicht gesamnen, so sullen die sechs das recht sprechen auf ir ayd vnd wer auch, daz die sechs mit dem rechten nicht vberain komen möchten, so sol der purggraf als ein obman das recht darumb sprechen auf den ayd vnd dabei sullen wir auch denn genczlich beleiben. Vnd sullent auch die sechs von Pazzaw nicht komen, si sprechen denn vor darumb auz. Geschech aber, daz der vorgenant vnser swager der purggraf von ehafter not wegen zu dem tag nicht komen möcht, so sol es von demselben tag vber vier wochen gesteen, aber als vorgeschriben stet, vnd sol das ain tail den andern bei zeit wizzen lazzen. Geschech auch, dauor Got sei, daz der purggraf vnser swager in der zeit abgieng, so sullen die sechs dennoch ze Pazzaw auzsprechen vnd sullen iren spruch dem durleuchtigen fursten vnserm lieben herren dem römischen kunig verschriben senden, wa er denn ist, vnd der sol dann vmb die sache auzsprechen als ein obman vnd sol auch der auzspruch geschehen vor dem Suntag Letare schierest chunftig. Vnd welcher tail also in dem geuerlichen savmig wurd, der sol alle seine recht verloren haben. Mit vrchund dicz priefs, der geben ist ze Reichenhalle an Mitichen nach sand Andrestag nach Kristes geburt dreuczehenhundert jar darnach in dem zwai vnd achczigisten jare.

Source Fulltext: OÖUB 10 (Wien 1933), S. 139-141