Ich Jans der Chemnawter vnd Symon mein vetter vnd all vnser erben veriehen vnd tun chunt allen den, die den prief sehent oder hoeren lesen, daz wir rat^a) vnd gunst aller vnserr frwnd haben gehabt an der czeit, do wir ez wol getun mochten, vmb daz geschefft vnsers lieben vetters seligen sel Vlreichs dez Chemnawters vnd vnserr erben haben wir gechaufft daz gut, daz da genant ist der Perg in Rewthaimer pfarr ze nechst pei der widern auf dem selben perg, von vnserm enen Walchain dem Kerspergeren vnd daz erb recht auf der nidern Widem in der selben pfarr hab wir ab gechaufft. Die selben ablosung vnd das gut auf dem perg cze Rewthaim, daz vnseres enen Walchains dez Kersperger gewesen ist. geben wir vnd schaffent ez mit aller seiner zugehorung cze veld cze holcz vnd cze dorf, als ez von alter her ist chomen mit allen nuczen vnd rechten, dem erbern herren dem probst vnd dem conuent dacz sant Nyclaw cze Passaw czu irrer czu kirchen gen Rewthaim, die da gehoret gein Widemspach irrer kirchen, fur ain freis lediges aign^b) vnuerchumercz, daz sie da mit hinfur mugen schaffen allen iren frum wie in geuelt mit verseczen oder verchauffen oder wie sie iren frum vnd nucz mugen da mit geschaffen durch vnsers lieben vetterns sel wegen des vorgenannten VIreichs dez Chemnawters vnd aller vnserr erben. Vnd wazz sie an gieng von ieman von der gueter wegen, die oben in dem prief geschriben seint, oder schaden nemen, daz schullen sie haben auf aller vnserr hab, die wir habent, wa dew sei, vnd schullen ir fürstant sein vnd geweren vor geistleichen vnd weltleichen gericht an all irr scheden. Vnd daz allez sampt ewigleich stett peleib vnd sei, so geb wir in den prief versigelten mit meinem Jansen des Chemnawters anhangundem insigel, dar vnder sich verpint mein vetter Symon der nit aigens^c) insigels hatt vnd all ander vnser erben vnd auch czu waren geczwgnuzz mit Jansens des Saurchaimers anhangundem insigel vnd mit Hainczels ab dem Lerpuhel cze Wangchaim anhangundem insigel, die wir fleizeleich dar vmb gepeten haben in an schaden. Der prief ist geben worden, do man zalt von Cristes gepurt drivczehen hundert jar vnd in dem drew vnd achczistem iar, an dez hailig Craücz abent, alz ez funden ist worden.

Source Fulltext: OÖUB 10 (Wien 1933), S. 181-182