Wir graf Hainreich von Schavmberg bechennen für vns vnd alle vnser erben vnd nachkomen offenlich mit dem brief allen den, die in sehent lesent oder hörent lesen, daz wir mit pillicher betrachtung angesehen vnd bedacht haben die gnade fürderung vnd manigualtige guttete, so von den durchleuchtigen fürsten den herczogen von Österreich loblicher gedechtnusse hie vor vnsern voruordern grafen ze Schawmberg wideruaren sind vnd die vns auch noch hinfür von dem durchleuchtigen fürsten vnsern genedigen herren herczog Albrechten herczogen ze Östereich etc. vnd seinen nachkomen vns vnd vnsern erben vnd nachkomen wideruaren mugen, vnd haben darvmb vnd auch nach solichen redlichen vnd freuntlichen taidingen, die zwischen dem yeczgenanten vnserm lieben herren vnd vns nv gegenwurtichlich geschehen sind, auf ein new stete vnd lautter frevntschaft vnd svne aller der misschellung vnd chrieg, die ettlich zeit her zwischen vns erstanden waren, mit guter vorbetrachtung vnd nach rate vnserr frevnde räte diener vnd getrewen alles vnser aygen, wa das gelegen vnd wie es genant ist, alz vnser vordern seligen vnd wir das in aygens gewer herbracht haben, von demselben vnserm lieben herren herczog Albrechten vnd allen seinen erben vnd nachkomen vnd auch von dem fürstentum ze Österreich zu rechtem lehen genomen vnd emphangen, nemen vnd emphahen die auch wizzentlich mit chraft dicz briefs für vns und alle vnser erben vnd nachkomen ze haben vnd ze niezzen von in ewichlich in lehens weise, alz lehens recht ist vnd des Landes recht ze Östereich, vnd sullen auch damit ir getrewen man sein ewichlich, an alles geuer. Denne vmb alle vnsere lehen, die wir von andern herren denn von dem fürstentum ze Österreich ze lehen haben, wie di genant oder wa si gelegen sein, nichtz auzgenomen, svnderlich vnd mit namen die vesten zu Schavmberg zu Stauffen zum Newnhaus vnd die stete Euerding vnd Pewrbach mitsampt allen iren zugehörungen, dieselben geslos vnser lehen sind von dem bistum ze Pazzaw, haben wir gelobt vnd geloben auch wissentlich mit dem brief für vns vnd alle vnser erben vnd nachkomen, daz wir die auch von dem vorgenanten vnserm genedigen herren herczog Albrechten vnd allen seinen erben vnd nachkomen herczogen ze Österreich vnd von seinem fürstentum daselbs ze Österreich zu gleicher weise sullen vnd wellen zu lehen nemen erchennen vnd emphahen ewichlich vnd in auch vnser offen briefe daruber geben, an alles vercziehen, wenne das geschicht, daz vnser obgenanter herr oder sein erben der herren willen vnd gunst darczu gewinnet, von dem wir die yeczund ze lehen haben. Es sullent auch vnser obgenanter herr vnd alle sein erben vnd nachkomen herczogen ze Östereich die obgenanten lehen alle, alz oben an dem brief geschriben stet, vns vnd vnsern erben alle weg, so das ze schulden chumt, genedichlich leihen an alle irrung, vngeuerlich. Darnach so haben wir auch mit guter vorbetrachtung vnserm obgenanten genedigen herren herczog Albrechten zu Östereich vnd allen seinen erben vnd nachkomen vernewet beweret vnd bestetiget, vernewen beweren vnd bestetigen auch mit chraft dicz briefs die hantfesten, die weilent graf Wernhart, vnser vetter, graf Ulreich, vnser bruder, vnd wir vnserr vorgenanten herschaft ze Östereich gegeben haben vnd auch all ander brief, die si von weilent vnsern voruordern seligen grafen zu Schawnberg oder von vns habent, vnd geloben wissentlich, daz wir die mit allen den punden vnd artikeln, die darinne begriffen sind, nv fürbazzer ewichlich stet haben vnd genczlich volfüren sullen vnd wellen vnd dabey beleiben getrewlich vnd an all arg liste vnd dawider nymmer chomen noch tun in dhain weise. Auch sullen wir vnsere lantgericht handeln halten vnd innehaben in aller der mazze, alz vnser vordern getan habent vnd alz von alter herchomen ist vnd auch nach lautt der hantfest, die vnser egenanter vetter vnser bruder vnd wir der egenanten vnserr herschaft zu Östereich gegeben haben. Wir sullen auch vnser mautt zu Ascha nemen dacz Ascha vnd nindert anderswa auch in aller der mazze, alz die von alter herchomen ist vngeuerlich. Vnd ze vrchund vnd sicherhait der obgeschriben dinge geben wir obgenanter graf Hainreich von Schavmberg den gegenwurtigen brief versigelten mit vnserm anhangenden insigel. Vnd haben auch gebetten die edlen wolgeporn graf Purcharten purgrafen ze Maidburg vnsern lieben ehem, Johansen von Abensperg, vnsern sweher, vnd Hansen von Meissaw, auch vnsern lieben öhem, daz si ire insigel zu dem vnsern durch pezzer geczeugnusse vnd sicherhait willen in an schaden auch gehenchet habent an den brief, der geben ist ze Lyncz an sand Kolmans tag nach Kristes gepurd dreuczehenhundert iar darnach in dem drew vnd achczigisten iare.

Source Fulltext: OÖUB 10 (Wien 1933), S. 209-211