Wir graf Hainrich von Schowmberg bechennen vnd tun chunt offenlich mit dem brief für vns vnd alle vnser erben vnd nachkomen vmb die zuspruch, so wir gehabt haben hincz den vesten vnd herscheften ze Starchenberg vnd ze Weydenholcz vnd hincz den lantgerichten lehen leuten vnd gütern vnd aller anderer irer zugehörung, wie die gnant oder wa die gelegen sind, die der hachgeborn fürst vnser lieber gnediger herr herczog Albrecht herczog ze Österreich etc. gechouffet vnd in sein gwalt pracht hat, daz wir derselben zusprüche gar vnd genczlich dem vorgenanten vnserm herren von Österreich vnd allen seinen erben vnd nachkomen ewichlich, oder wer die vorgenanten vesten vnd herschaft in chunftigen zeiten innehat, abtreten vnd vns der genczlich verczeihen also, daz wir noch vnser erben oder nachkomen noch yemand ander von vnsern wegen fürbaz von lehens oder dhainer anderer ansprach wegen dhainen zuspruch oder vordrung darczu nymermer haben noch gewinnen sullen noch mügen in dhain weis. Vnd sol ouch der sprach, den darumb der hachgeborn fürst herczog fridrich von Payrn zwischen dem egenanten vnserm herren von Österreich vnd vnser getan solt haben, genczlich vnd gar absein. Vnd des zu vrchund geben wir dem egenanten vnserm herren von Österreich den brief besigelt mit vnserm anhangendem insigel vnd mit der edln herren vnser lieben freunt graf Purchart von Maidburg, Hanses von Abensperg vnsers swehers vnd herrn Hanses von Meissow insigeln, die wir fleizzig gebetten haben, daz si ire insigel auch gehenkt habend zu zeugnuzz an disen brief in ane schaden, der geben ist ze Lincz an sand Kolmans tag nach Christs geburd dreuczehenhundert iar darnach in dem dreu vnd achczigistem iare.

Source Fulltext: OÖUB 10 (Wien 1933), S. 212-213