Wir Johanns von Gotes genaden bischof ze Pazzaw vnd wir Herman techannt vnd das capitel gemainchleich der stift doselbs bechennen vnd tun kunt offenleich für vns vnd all vnser nachkomen ewichlich, allen den, die den brief sehent lesen oder hörn lesen, das für vns den obgenanten bischof Johannsen komen ist der edel vnd wolgeborn graf Heinreich von Schawnberch vnd gab vns auf für sich vnd alle sein eriben vnd nachkomen die vestten vnd herschefft ze Schawnberch ze Stawffen vnd zum Newnhaws vnd auch die stat Euerdingen mitsambt allem dem, so darzu gehört, die er von uns vnd unserm gotzhaws ze Pazzaw ze lehen het, vnd pat vns vleizzichlich, das wir die von im aufnemen vnd si verleihen geruchten dem durichlawchtigen hochgeborn fürsten vnserm lieben herren hertzog Albrechten herczogen ze Ostereich etc. vnd allen seinen eriben vnd nachkomen an demselben herczogentum zu Östereich. Nu haben wir mit guter vorbetrachtung angesehen vnd bedacht die grozzen beschirmung hilffe vnd füdrung, die hieuor vnsern voruodern vnd auch vns vnd vnserr stift von den alten fürsten von Östereich vnd auch dem egenanten herczog Albrechten manigualtichlich wideruarn sind vnd auch hinfür wideruarn sullent vnd mugent vnd haben darumb die egenanten herschaft vesten vnd geslos Schawnberch zu Stawffen vnd zum Newnhaws vnd Euerdingen mitsambt aller irr zugehörung manscheften gerichten lawten vnd gütern zinsen vnd zehenden vnd allem andern, so darzu gehört, wie das genannt oder wo das gelegen ist, von dem obgenanten graf Heinreichen zu Schawmberch aufgenomen vnd si dem vorgenanten hertzog Albrechten hertzogen zu Östereich etc. vnd allen seinen eriben vnd nachkomen an dem hertzogentum ze Östereich verlihen vnd verleihen auch wizzentleich mit kraft des gegenwurtigen briefs also, das si die nu fürbas ewichlich von vns vnd allen vnsern nachkomen vnd von vnserr stift ze Pazzaw zu rechtem lehen haben sullen vnd mügen, als lehens recht ist vnd des landes recht zu Östereich, an alles geuar. Vnd darüber zu ewigen vrchund vnd sicherhait geben wir den brief besigelten mit vnserm obgenanten bischof Johannsen vnd auch vnserm des capitel anhanngunden insigeln, geben ze Lintz an Freytag sand Gallen tag nach Kristi geburde drewtzehenhundert iar vnd in dem drew vnd achtzigisten iare.

Source Fulltext: OÖUB 10 (Wien 1933), S. 219-221