Wir Albrecht von Gots gnaden hertzog ze Osterreich ze Steir ze Kernden vnd ze Krain graf ze Tirol etc. bekennen offenlich mit dem brief, als der edl vnser getrewr lieber ohaim graf Hainreich von Schawnberg die vesten vnd geslos ze Schawnberg ze Stawf zw dem Newnhaws vnd zu Euerding, die vntzt her sein lehen gewessen sein von dem bistumb ze Passaw, dem erwirdigen vnserm lieben frewndt herrn Johannsen bischouen zw Passaw aufgeben hatt vnd den gepetten vnns dj ze uerleihen, das wir dieselbigen lehen alle dem egenanten vnserm ohaim vnd allen sein eriben sunen vnd tochtern hinwider verlichen haben vnd leichen auch mit dem brief. Darzw geloben wir mit vnsern furstlichenn gnaden fur vnns vnd all vnnser eriben vnd nachkomen, das wir im vnd allenn sein eriben sunen vnd tochtern dieselbigen lehen albeg, so das zw schulden kumbt, gnadiclich leichen sullen vnd wellen an all jrrung vngeuerlich. Vnd darüber zw vrkund gebem wir dem egenanten von Schawnnberg disen brief versiglt mit vnserm anhangunden jnsigel, der geben ist ze Lynntz an Sambstag nach sannd Gallen tag nach Kristi gepurd drewzechnhundertt jar darnach in dem drew vnd achtzigistenn jarenn.

Source Fulltext: OÖUB 10 (Wien 1933), S. 222