Ich Wernhart der Pramperger ich Hanns vnd ich Pauls di Pramberger gebruder sein sün veriehen von tun kund offenlich mit dem brief fur vns vnd fur all vnser erben, das wir vns liepleich vnd gütleich verricht vnd verteidingt haben mit den edln wolgebornen herren graf Heinreich von Schaunberg vnd graf Vlrich von Schaunberg seinen sun vnsern lieben vnd genedigen herren vmb all vodrung vnd ansprach, di si hintz vns gehabt habent vnd auch dar vmb ich egenanter Wernhart Pramperger vnd Hanns mein sun gefangen sein gewesen ze Pewrbach vnd derselben vanchnuss wir nu ledig vnd los sein allso, das wir mit vnsern trewen an rechter aide stat gelobt haben vnd versprechen, das wir noch nyemt von vnsern wegen vnsern egenanten Herren von Schawnberg oder iren erben noch chainen den iren oder wer an der egenanten vanchnuss schulldig oder verdacht ist mit wortten oder mit werchen, mit rat oder mit tat nicht dester veinter oder gehässige sein sollen noch wollen in dheiner weis vnd das nymmer mer geäfern weder mit wortten noch mit werchen. Vnd sollen vnd wellen vns auch von den egenanten herren vnd von der herschafft vnd grafschafft nicht enpfremden noch entziehen weder mit leib noch mit gut heimlich noch offenlich noch vns nyndert hinder anderr herren verfuren noch verhorren noch hinder chain herschaft faren noch setzen denn hinder vnser egenant genedigew herschaft zu Schawnberg. Besunder sollen vnd wellen wir hinder in stätichlich vnd getreulich beleiben vnd in vnenpharen sein in aller der mass alls ir vnuerrechent ambtlewt. Vnd ob wir das ynndert vberfüren, so sollen wir gutlos vnd erblos sein vnd sol sich vnser leib vnd alles vnser gut gar vnd genntzlich verfallen haben in vnsrer egenanten genedigen herschaft gewallt an allew genad vnd an allew widerrede vnd mugen vnser leib vnd gut vodern nemen vnd anfallen mit recht oder an recht, wie si wellent, wo si daz an choment hinder andern herren, dar an si nyemt hindern noch irren sol in dheiner weise. Wär auch, das wir vns von vnserr egenanten herschaft inndert zugen oder verfüren hinder ander herren, da mag vns vnser egenantew herschaft wol nach faren vnd vodern an di selben herren, di sollen vns in nicht vorhaben vnd sollen vns in antburten alls ir vnuerrechent ambtleut. Wär aber, daz der herre, dar hinder wir füren von vnsrer egenanten herschaft, vns nicht antburttet vnd vns in vorhallten wollt, wie sich das füget, so soll der herr, der vns wider vnser egenantew herschaft hallten vnd nicht antburtten wollt, in all den schullden vnd zusprächen sein, da wir gen vnser egenanten herschaft von Schawnberg inn sein vnd sollen all di recht hincz im haben alls hintz vns selb. Dez allez zu einem waren vrchund geben wir vorgenant Pramperger vnsern egenanten herren von Schawnberg vnd iren erben den brief besigellten mit der erwern Erasm dez Aichperger vnd Paullsen des Aichperger di zeit pfleger ze Pewerbach vnd Steffan des Richter daselben aller anhangenden jnsigelen, di si dar an gelegt habent in vnd iren erben an schaden, darvnder wir vns mit vnsern trewn an aides stat verbinden stat ze haben vnd ze volfüren, waz an dem brieff von vns stet geschriben trewlichen an allez geuärd. Das ist geschechen nach Christi gepurtt dreuczehen hundert jar vnd dar nach indem newntzigisten jare an dem Freytag nach dem heiligen Pfingst tag.

Source Fulltext: OÖUB 10 (Wien 1933), S. 619-621