Ich Jorig der Anhanger von Rewtt bechenne vnd tun kunt offenlichen mit dem brief vmb allen den handel, der sich zwischen mein vnd meins brueder Gengleins des Anhanger von Rewtt vncz auf hewtigen tag vnd der brief geben ist vergangen vnd verlawffen hat, des alles nichts ausgenomen, darumb sein wir liebleich vnd frewntleich miteinander bericht vnd ist zwischen vnser herren vnd (vns?) getaidingt, ob hinfur vnser ainr von dem andern ichtes beschäch, wie than wegen sich daz vergieng oder welherlay tätt oder handell das wer, dar sol der, dem da geschicht, an den edeln herren hern Reinprechten von Waltse hauptman ob der Enns oder an seinen landrichter oder (wer) zder selben zeitt hauptman oder landrichter ob der Enns ist bringen, daz der schaff vnd darczu tu, das daz dem andern so beschehen ist, abgenomen vnd widerchert werde. Wer aber ein haubtman oder ein lantrichter nach der chlag sawmig vnd darczu nicht tun wolt, so sol der, dem geschehen ist, gegen seinem brueder vmb di tätt vnd dem handell daz recht suchen. Auch vergich ich obgenanter Jorig Anhanger von Rewtt vnd verpind mich mit dem gegenburtigen brif, ob ich oder yemand andrer von meinen wegen hinfur wider den egenanten meinem brueder Genglein den Anhanger von Rewtt dhaynerlay weis merklicher tatt icht handlatt oder tatt anders, dann vorgemeltt vnd begriffen ist, di man mit einer gewissen furbringt, so pin ich Gorig Anhanger von Rewtt dem edeln hochgeborn fürsten meinem genadigen herren dem herczogen ze Österreich etc. veruallen leibs vnd guts an alle genad. Darczu pin ich denn mit dem rechten vnd mit dem gegenburtigem brief enteribt alles meins eribtails, wie so der genant oder wo der gelegen ist, dogegen ich denn vnd mein erben dhain recht vodrung noch zuversicht nymmer gehaben noch gewonnen sullen dhainer weis vngeuerdlich. Vnd mag denn der obgenant fürst vnd herr der herczog cze Osterrich etc. oder wer seinen gewalt hat, ob ez also ze schulden chumpt, alz vor begriffen ist, mit meinem leib vnd gut handeln schaffen vnd tun, wie in des verlust vnd aller pest fuegund vnd gevallend ist. Daz ist dann guetleich mein will vnd wer mich denn dawider haymet haldet oder fuedert, der tutt genczlich wider recht. Der vorgeschriben berichtigung sach vnd auch puntnuss gib ich Gorig Anhangär von Rewtt ze vrchund vnd scheinber guts gedachtnuss den brif mit meinem aygem anhangunden insigel vnd auch mit meiner liben frewnd insigel hern Vlreichs des Anhanger Jochleins des Anhanger vnd Vlreichs des Anhanger von Hub insigeln besigelt, damit si der sach vnd tayding durch meiner vleizziger pett willen zeug sind, in vnd iren erben an schaden. Der brief ist geben, do man zalt von Christs gepurd drewczehenhundert jar vnd in dem zway vnd newnczkisten jar des nechsten Suntags nach dem heyligen Ostertag.

Source Fulltext: OÖUB 11 (Wien 1983), S. 85-86