Ich Vlreich Schöppel verig ze Lantzhag vergich vnd tun kunt offenlichen mit dem gegenburtigen brief allen lewten icz lembtigen und hernach chunftigen, alz ich in des edeln herren hern Reinprechts von Waltse des hauptmans ob der Enns venkchnuzz komen pin vmb beschuldnuss vnredlichs handels von vberfürens wegen am vruar ze Lanczhag, aus derselben venkchnuss vnd pessrung mir der egenant mein her von Waltse durch meiner frewnd und ander erber lewtt bett willen erlawbt hat, in der mazz berett vnd getaydingt, wann der egenant mein her von Waltse oder an seiner stat sein anwalt mich obgenanten Vlreichen den Schopplein von Lanczhag mit worten oder mit briefen vodernt, so sol ich mich ze stat nach der vodrung an alle widerred vnd auszug stellen in die venkchnusse in di vest gen Wassenberch in aller der mazz und rechten, als ich vor darinn gewesen vnd gehabt bin worden vnd daraus an des phleger doselbs willen wissen vnd haizzen nicht auskomen, ez werde mir denn mit einer guter wissen erlawbt. Wer aber, daz ich mich ze stet nach der monung vnd in der mazz, als vor begriffen ist, in die venchnuss gen Wassenberch in die vestt nicht stellt, so pin ich Vlreich Schoppell ein rechter vbersagter man vnd bederff man denn gen mir andere weisung vnd rechten nicht, dann mit dem gegenburtigen brief sol ich geuertigt (werden) vnd des zuchtinger pessrung vber mich gen. Vnd ob ez also ze schulden kumpt, alz vor geschriben stet, wer mich denn dawider hielt haymet oder fuedert, der tutt wider sein ere vnd trew vnd wider recht. Wir hernach verschriben mit den namen des oftgenanten Schoppleins frewnd ich Philipp Vischer ich Michel Vischer ich Vlreich Vischer ich Andre Chonrats geswey ich Hanns Sampner ich Mert Vischer ich Chonrat auf dem Graben, ich Andre Pintter, wir vorbenant all gesessen cze Lanczhag, vnd ich Stephan Schopper verig ze Aschach ich Wernhart Pawman vnd ich Hanns Angrär auch gesessen ze Aschach wir loben versprechen vnd verhaissen, ob der obgenant vnser frewnt Vlreich Schopper von Lanczhag di gelub vnd puntnuss, als vorgeschriben vnd begriffen ist, nicht stat hielt vnd di vbergriff, wie daz wer, verhaissen vnd versprechen wir all vnd vnser jeglicher besunder an eins rechten gesworn aydes stat, daz wir denn sein recht veynt wellen sein vnd vngeuerdlich nach im stellen, daz er darczu gestellt vnd pracht werde, daz das an im volfurt werde, alz vor an dem brif mit worten begriffen ist. Der vorgeschriben sach gelüb vnd puntnusse gib ich Vlreich Schoppell von Lanczhag vber mich den gegenburtigen brif besigelten mit der erbern weysen Atakcher des Piber Vdungen des Herleinsperger und Philippen des Premisser insigel. Wann ich Vlreich Schappell vnd wir vorbenanten sein freund aigner insigel nicht enhaben, haben wir di vorgenanten drey vmb ire insigel vleizzichlich gepeten daz si di zu einer geczewgnuss an den brif gelegt haben in vnd iren erben an schaden, darvnder wir vns in aydes weis verpunden. Der brief ist geben, do man zalt von Krists gepurd tawsent iar drewhundert iar vnd in dem zway vnd newnczkisten jar an des heyligen herren sand Erharts tag.

Source Fulltext: OÖUB 11 (Wien 1983), S. 68-69