Wir Albrecht von Gots gnaden herczog ze Österreich ze Steyr ze Kernden vnd ze Krain graf ze Tyrol etc. bekennen, daz wir vnsern getrewn der ganczen gemain ze der Freynstat hin gelazzen haben vnd lazzen auch vnsern wein vngelt daselbs ze der Freinstat vnd was darzu gehöret mit allen den rechten nuczen vnd gewonhaiten, alz man den vormals da genomen het von den Phingsten nu schirist künftigen in dem zway vnd newnczigistem jar vber zway gancze iar, das wirt vncz auf die Phingsten in dem vier vnd newnczigistem jar darnach schirist künftigen, vmb sechs hundert phunt wienner phenning, der si vns oder vnser erben die egenanten zway iar igleichs iars dreuhundert phunt wern sullen zu den vier Quatembern igleichs iars, als sitleich vnd gewonleich ist. Wer aber, daz si icht sichtig scheden daran nemen von vrleug von pisezz oder von welherlay gepresten das geschech, der si vns mit erberer vnd guter kuntschafft aigenleichen möchten beweysen, die sullen wir genedichleich gen in erkennen. Mit vrkund dicz briefs geben ze Wienn an Phincztag vor dem heiligen Phingsttag nach Christi gepurd, dreuczehenhundert jar vnd in dem zway vnd newnczigistem jar.

Source Fulltext: OÖUB 11 (Wien 1983), S. 98