Dis sind die artikel, als vnser herre vnd sweher der Römisch küng ze vns herczog Albrechten herzogen zu Österreich zesprechen habent vnd vnser antwurt dagegen.||
Als denn vnser egenanter herre vnd swager der Römisch kung spricht, wie daz er in vnser land zu Österrich vnnd wider dar vss sy geuangen gefuert vnd daz sy mit vnser verhengnuss wissen vnd willen geschehen, sprechen wir, daz daz an vnser wissen vnd willen ist geschehen vnd wider vns ist gewesen, als sich das wol wurt erfinden, vnd als er spricht, daz wir in gern zu vnsern handen bracht hetten, sprechen wir, daz wir des vnschuldig sin vnd nye nach im gestelt haben, sunder als bald wir vernament, daz er yen Wilperg gefuert wär, do tatten wir den Starhenbergern mit vnser erber botschaft zu erkennen, daz daz wider vns werre.||
Item so hat vnser egenanter herre vnd swager sid her geschriben vnd gebetten, daz wir daz den Stärkenbergern vergeben und in nicht dester vyender werren, des wir noch nicht getan haben noch tun wolten.||

Source Fulltext: OÖUB 11 (Wien 1983), S. 322