Ich Hanns von Volkchenstorff vergich und tun kunt allen den, die den brief lesend oder horent lesen, die nu lebent und hernach chunftich sind, das ich mit aller meiner erben gutem willen und gunst mit wolbedachtem mut und nach rat meiner frewnt zu der czeit, do ich es wol getun mochtt, verchawfft han die vestt Kräwtzen das hinder haws und alles das, das darczu gehöret, es sei manschaft chirichlehen vogttay holden traidgult pheniggult behawste gut vberlent holcz waid wismad ekcher vischwaid wiltpan zehent pawmgarten aigen lehen purkchrecht perkchrecht in vrbar ze holcz ze veld und ze dorff, es sei gestift oder vngestift, versucht oder vnuersucht, wie es daz genant oder wo daz gelegen ist, nichts ausgenomen und alle die manschaft, die mein vater lazzen hat, ausgenomen des hawses dacz dem Wasen und des markchts ze Newnhofen und swaz darczu gehoret und nicht anders, daz alles aigen ist, denn die vorgenant vestt Chräwtzen und zwainczig phunt wienner phenig gelts, die darczu gehörent, sind lehen von dem hochgebornen fürsten herczog Albrechten ze Österreich ze Steyr ze Kernden und ze Krain graf ze Tirol etc., mit des hannden ich die verchawfft und aufgeben han. Dieselben vestt Chräwczen und alles daz, daz darczu gehoret, so vorbenant ist, ausgenomen des hawses dacz dem Wasen und des markchts ze Newnhofen mit irer zugehörung, han ich rechtt und redleich verchawfft und geben mit allen den nuczen eren und rechten, als es mein vater selig inne gehabet und hinder jm lassent hat und als es gegen meinem pruder Albern dem Volkchenstorffer an rechter tailung geuallen ist und als ich daz aigen in aigens gewer daz lehen in lehens gewer daz purkchrecht in purkchrechts gewer herpracht han und als es alles mit alter her chomen ist, vmb ein gelt, des ich gancz und gar verrichtet und gewert pin, dem vorgenanten meinem pruder Albern dem Volkchestorffer und seinen erben fürbaz die vorgenanten vestt dacz Kräwczen daz hinter haws und alles daz, daz darzu gehoret, so vorbenant ist, mit allen den nutzen eren und rechten, so vorgeschriben stet, ledichleich und vreileichen zu haben und allen iren frumen damit ze schaffen verchawffen verseczen machen und geben, wem si wellen, und alles daz damit tun und hanndeln, daz jn allerpest fuget oder wol geuellet an allen chrieg und irrsal. Vnd pin auch ich obgenanter Hanns der Volkchestorffer mit sampt allen meinen erben unuerschaidenleich der vorgenanten vestt Chräwczen des hintern haws und alles des, daz darczu gehoret, so vorbenant ist, mit allen den nuczen eren und rechten, so vorgescriben stet, ausgenomen des haws daz dem Wasen und des markchts dacz Newnhofen und irer zugehörung, so vor benant ist, des egenanten meins pruder Albers des Volkchestorffer und seiner erben rechtt gewern und scherm fur alle ansprach, des aigens als aigens recht ist, des lehens als lehens recht ist, der purkchrechts als purkchrechts (recht) ist und des perkchrechts als perkchrechts recht ist und des lanndes recht ze Österreich. Wer aber daz jn fürbaz an derselben vestt und an aller jrer zugehörung, so vorbenant ist, mit recht icht abgieng oder ob jn mit recht icht chriegs oder ansprach daran auferstund, von wem das wer, swaz si des schaden nement, daz schullen wir jn alles ausrichten und wider chern an allen iren schaden. Vnd schullen auch si daz haben auf vns und auf allem vnserm gut, daz wir haben in dem lannde ze Osterreich oder wo wir es haben, wir sein lembtig oder tod. Vnd daz der chauf furbaz also stet und vnczebrochen beleib, darüber so gib ich obgenanter Hanns von Volkcherstorff fur mich und fur all mein erben jn den brief zu einem waren vrchund der sach versigilten mit meinem anhangunden insigel und mit meiner lieben ochmen insigiln hern Vlreichs hern Hainreichs gepruder von Zelking und hern Albers von Ottenstain di czeit hofrichter in Osterreich, die der sach geczewgen sind mit irm anhangunden insigiln. Der brief ist geben ze Wienn nach Kristi gepurd drewczehen hundert jar darnach in dem viervndnewnczgistem jar des nechsten Erithags vor sand Agnesen tag der heiligen iunchfrawn.

Source Fulltext: OÖUB 11 (Wien 1983), S. 241-242