Johannes Rezano decretorum doctor canonicus Placentinensis domini nostri pape capellanus et ipsius sacri palacii apostolici causarum et cause ac partibus infra scriptis ab eodem domini nostro papa auditor specialiter deputatus vniuersis et singulis dominis abbatibus prioribus prepositis decanis archidiaconis cantoribus scolasticis thesaurariis tam cathedralium quam collegiatorum canonicis parrochialiumque ecclesiarum rectoribus seu locatenentibus eorundem plebanis capellanis altaristis vicariis perpetuis presbiteris curatis et non curatis beneficiatis notariis seu tabellionibus publicis et clericis quibuscumque per ciuitatem et dyocesem Patauiensem ac alias ubilibet constitutis et eorum cuiuslibet in solidum, ad quem uel ad quos presentes nostre littere peruenerint, salutem in Domino et mandatis nostris ymmouerius apostolicis firmiter obedire. Nuper sanctissimus in Christo pater et dominus noster dominus Bonifacius diuina prouidencia papa nonus quandam commissionis siue supplicacionis cedulam nobis per certum suum cursorem presentari fecit, quam nos cum ea, qua decuit, reuerentia recepisse noueritis tenorem, qui sequitur, continentem:||
Beatissime pater! Licet ecclesia parrochialis beate Marie Virginis in Byschofsdorf Patauiensis dyocesis a tempore sue fundationis et etiam tanto tempore, cuius non extat memoria, fuerit libera a quacunque pensione et solucione pretensi^a) annui census preposito canonicis et capitulo ecclesie sancti Michahelis Maticensis dicte diocesis, tamen idem prepositus Maticensis, cum eandem ecclesiam quondam Conradus Graf predecessor honorabilis viri domini Friderici Peterlehner nunc rectoris eiusdem ecclesie debuit assequi, eundem fecit^b) promittere, quod certam annuam pensionem eisdem^c) preposito canonicis et capitulo solueret de dicta ecclesia, prout soluit. Et demum vacantem dictam ecclesiam per obitum dicti quondam Conradi prefatus dominus Fridericus eandem vigore gracie apostolice a Sanctitate vestra eidem facte acceptauit et sibi de eadem prouideri obtinuit possessionemque dicte ecclesie assecutus fuit. Et demum cum idem dominus Fridericus esset pro certis suis negociis^d) in ciuitate Salczburgensi, prepositus canonici et capitulum dicte ecclesie Maticensis eundem dominum Fridricum in curia Salczburgensi pro solucione pretense^e) annue pensionis arrestari fecerunt et tunc dictus dominus Fridericus, credens ipsam ecclesiam ad dictam pretensam annuam pensionem dictis preposito canonicis et capitulo teneri et obligatam esse, ipsam eciam soluere eisdem promisit et soluit hucusque. Sed, Beatissime Pater! iam extitit per^f) parrochianos et incolas dicte ecclesie de certo informatus, quod dicta ecclesia fuit libera et ipsis preposito canonicis et capitulo non tenetur nec extitit obligata in aliqua annua pensione seu censu annuo. Et, Pater Sancte cum beneficia ecclesiastica sine diminucione conferri debeant, supplicatur Sanctitas vestra pro parte dicti domini Friderici rectoris, quatinus ipsum a promissione solutionis dicti pretense annue pensionis absoluere dignemini nec non committere alicui ex venerabilibus viris dominis vestri sacri palatii apostolici causarum auditori, quatinus predictis preposito canonicis et capitulo certum terminum competentem prefigat, infra quem legitime doceant de causa rationabili debiti dicte pretense pensionis seu annui census, quod si non fecerint infra terminum assignandum, quod ex tunc eisdem super predicta pretensa annua pensione seu annuo censu perpetuum silencium imponat; necnon eidem domino auditori committere causam et causas, quam et quas mouet seu mouere intendit prefatus dominus Fridricus dictis preposito canonicis et capitulo de et super indebita recepcione dicte annue pensionis seu pretensi annui census et eius occasionis audiendas^g) decidendas^g) et fine debito terminandas^g) cum omnibus et singulis emergentibus incidentibus dependentibus et connexis; et cum potestate citandi prefatos prepositum canonicos et capitulum in Romana curia et^h) extra et ad partes tociens, quociens opus fuerit, non obstanti, quod causa seu cause huiusmodi non fuit forsan de sui natura in dicta Romana curia tractande seu etiam finiende.||
In fine vero dicte commissionis siue supplicationis cedule scripta erant de alterius manus litera priori litere ipsius cedule penitus et omnino dissimili et diuersa videlicet hec verba:||
De mandato domini nostri pape audiat magister Johannes de Rezano, citet, ut petitur, et iusticiam faciat. Post cuius quidem commissionis siue supplicationis cedule presentacionem et receptionem fuimus per honorabilem virum dominum Fridericum Peterlehner principalem predictum in suprascripta nobis facta et presentata commissione principaliter nominatum coram nobis constitutum debita cum instantia requisiti, quatinus sibi curatorem extra Romanam curiam et ad partes contra et aduersus prepositum canonicos et capitulum ecclesie Michahelis Maticensis dicte Patauiensis dyocesis ex aduerso principales etiam in dicta nobis facta, ut prefertur, et presentata commissione principaliter nominatos in forma solita et consweta iuxta vim formam et effectum commissionis suprascripte nobis ut premittitur facte decernere et concedere dignaremur. Nos igitur Johannes auditor prelibatus attendens requisitionem huiusmodi fore iustam et consonam racioni volentesque in causa et causis huiusmodi rite ac legitime procedere ac partibus ipsis dante Domino iusticiam ministrare, ut tenemur, vos omnes et singulos supradictos et vestrum quemlibet in solidum, quibus presentes nostre littere diriguntur, auctoritate apostolica nobis in hac parte commissa tenore presentium requirimus et monemus primo secundo tercio et peremptorie communiter et diuisim vobisque nichilominus et vestrum cuilibet in virtute sancte obediencie et sub excommunicacionis pena, quam in vos et vestrum quemlibet canonica monicione premissa ferimus in hiis scriptis, nisi feceritis, quod mandamus, districte precipiendo mandans, quatinus infra sex dies post presentacionem seu notificationem presentium vobis uel alteri vestrum factam inmediate sequentes, quorum sex dierum duos pro primo duos pro secundo et reliquos duos dies pro tercio et peremptorie termino ac monicionem canonicam prefigimus et etiam assignamus, ita tamen, quod in hiis exequendis vnus vnum alium non expectet nec alter pro altero se excuset, prefatos dominos prepositum et canonicos in eorum propriis personis, si ipsorum presentias comode habere poteritis alioquin in hospitiis habitationum suarum, si adeo tutus pateat accessus, capitulum vero ecclesie Maticensis Patauiensis diocesis, predictarum ex adverso principales, in loco eius capitulari, dum ibidem ad sonum campane uel alias, vt moris est, capitulariter congregatum fuerit, sin autem in cathedrali Patauiensi et collegiata sancti Michahelis Maticensi dicte dyocesis ecclesiis infra missarum sollempnia, dum ibidem populi multitudo conuenerit ad diuina, aliisque ecclesiis et locis publicis, vbi et in quibus quotiens et quando expediens fuerit, prout fuerint requisiti seu alter vestrum fuerit requisitus, ita quod huiusmodi citatio ad ipsorum et cuiuslibet eorum noticiam poterit verisimiliter peruenire et, quod in posterum nullam de premissis et infrascriptis ignoranciam praetendere valeant seu etiam quolibet allegare, ex parte nostra ymonerint apostolica, pub1ice alta et intelligibili voce peremptorie citare curetis, quos nos eciam tenore presentium sic citamus, quatinus sexagesimaⁱ⁾ die post citationem nostram^k) huiusmodi per vos uel alterum vestrum eis factam inmediate sequente, si dies ipsa sexagesima iuridica fuerit et nos uel alius forsan loco nostri surrogandus auditor, si quem interim surrogari contigerit, Rome in palatio causarum apostolico, in quo iura reddi solent, uel alibi, vbi tunc forsan idem dominus noster papa cum sua curia residebit, ad iura reddendum in loco nostro solito pro tribunali sederimus uel sederit, alioquin proxima die iuridica extunc inmediate sequente, qua nos uel predictum forsan auditorem surrogandum mane hora causarum ad iura reddendum pro tribunali in dicto palacio causarum apostolico sedere contigerit, per se uel procuratorem seu procuratores suos idoneos ad causam seu causas huiusmodi sufficienter instructos cum omnibus et singulis actis et citatis iuribus instrumentis processibus priuilegiis et aliis suis munimentis ad causam seu causas huismodi facientes seu eam et eas quolibet tangentes seu concernentes compareant in iudicio legitime coram nobis uel predicto auditore surrogando prefato domino Fridrico principali uel eius legitimo procuratori de et super omnibus et singulis in prescripta nobis facta commissione contentis de iusticia responsuri, aliasque in causa et causis huiusmodi ad omnes et singulos actus gradatim et successiue et usque ad diffinitoriam sententiam inclusiue debitis et conswetis terminis et dilacionibus precedentibus ut moris processuri et procedi visuri aliasque dicturi facturi audituri allegaturi responsuri et receoturi, quod iusticia swadebit et ordo dictauerit racionis, certificantes nichilominus eosdem citatos et eorum quemlibet, quod siue in dicto citationis termino, vt premissum est, siue non, nos nichilominus aut dictus forsan surrogandus auditor in causa et causis huiusmodi vnacum parte coram nobis comparente et secum procedi postulante vlterius, provt iustum fuerit, procedemus seu procedet, dictorum citatorum absencia seu contumacia in aliquo non obstante. Diem vero citationis nostre huiusmodi atque formam et quidquid in premissis feceritis seu alter vestrum fecerit nobis per vestras patentes litteras aut instrumentum publicum harum litterarum nostrarum seriem seu designacionem in se continentem seu continens remissis presentibus, quantocius poteritis, fideliter intimare curetis. Absolucionem vero omnium et singulorum, qui prefatas nostras sententias uel earum aliquem incurrerint seu incurrerit quoquomodo, nobis uel superiori nostro aut surrogando predicto tantummodo reseruamus. In quorum omnium et singulorum fidem et testimonium premissorum presentes nostrae citationis litteras aut instrumentum publicum huiusmodi nostram citacionem in se continentes seu continens exinde fieri et per Nicolaum notarium publicum nostrumque et huiusmodi cause coram nobis scribam infrascriptum subscribi et publicari mandauimus et, quia de presenti proprio sigillo caremus, sigilli venerabilis viri domini Brande de Castelbono coauditoris nostri appensione fecimus communiri. Datum et actum Rome in palacio causarum apostolico, in quo iura reddi solent, nobis inibi mane hora causarum ad iura reddendum in loco nostro solito pro tribunali sedentibus sub anno a natiuitate Domini millesimo trecentesimo nonagesimo quinto indiccione tercia die vero vicesima mensis Decembris pontificatus sanctissimi in Christo patris et domini Bonifacii pape noni predicti anno septimo presentibus ibidem discretis viris magistris Johanne Wynam et Ambrosino de Conradi notariis publicis scribisque nostris clericis Leodiensis diocesis et Mediolanensis ciuitatis testibus ad premissa vocatis specialiter et rogatis.||
Et ego Nicolaus Alues clericus Padeburnensis diocesis publicus apostolica auctoritate notarius et venerabilis viri domini Johannis de Rezano auditoris et huiusmodi cause predicte coram eo scriba predicte citacioni peticioni eiusque decreto omnibusque aliis et singulis, dum sic, vt premittitur, per dictum dominum auditorem et coram eo agerentur et fierent, vnacum prenominatis testibus presens interfui eaque sic fieri vidi et audiui, ideo hoc presens publicum instrumentum propria manu mea scriptum exinde confeci publicaui et in hanc publicam formam redegi signoque meo solito vnacum appensione sigilli prefati domini Brande auditoris signaui rogatus et requisitus in fidem et testimonium omnium premissorum.

Source Fulltext: OÖUB 11 (Wien 1983), S. 454-460