Ich Ernst der Preuhafen vnd ich Jörg sein sun vergehen offenleich mit dem brief fur vns vnd all vnser erben, den er furchumpt, als die hochgeborn fürsten vnser genädig lieb herren herczog Wilhalbm vnd herzog Albrecht gevettern herczogen zu Österreich etc. vns die genad getan habend vnd vns ingegeben vnd empholichen habent ir vest Chlingenwerg gelegen im Achland mit allen den nutzen gulten vnd ander zugehörung, als si die gehebt vnd herbracht habent vnd von alter herchomen ist, angeuer nach irer brief sag, die wir von in darüber haben, also beschaidenleich, das wir obgenant Ernst vnd Jörg sein sun dieselben vestt Chlingenwerg mit aller irer zugehörung innhaben nutzen vnd niessen in eins rechten leybgedings weyse, als leybgedings vnd lanndes ze Osterreich recht ist vngeuerleich. Vnd wenn das ist, das wir obgenant zwen Ernst vnd Jörg mit dem tod abgeen, da Got lang vor sey, so sol die obgenant vest Chlingenwerg mit aller irer zugehörung den hochgeborn fürsten oder irn erben gar vnd genczleich wider ledig vnd los sein vnd sullen all vnser erben vnd frewnd da engegen chainerlay ansprach nicht haben in dhainerlay wayse angeuer. Auch sullen wir oder wer die vest von vnsern wegen innhat, den hochgeborn fürsten oder irn erben damit gewertig sein vnd in oder irn erben die offen haben, darin vnd daraus ze lassen, sew oder wen si an irer stat darczu schaffent vnd darinn enthalten wider allermenchleich nyempt ausgenomen, wenn vnd wie offt in des durft geschieht, an vnser merhleich scheden. Wir sullen auch dieselb vest nicht pawuellig lassen werden, sundern wir sullen sy albeg in gutem paw halten. Vnd des ze urchund geben wir in den brief versigilten mit mein obgenanten Ernsten des Preuhafen anhangundem insigil vnd wannd ich obgenanter Jorg selber aigen insigel noch nicht han, so verpind ich mich vnder meins vater insigil, alles das fest ze haben vnd zu volfürn, das vor an dem brief geschrieben stet vnd dawider nicht ze tun, vnd hinder der erbern insigilen Chunrats des Fleminrikch vnd Stephanns des Vennden, die der sach gezeugen sind mit irn insigiln, in vnd irn erben an schaden, die wir des vleissichleich darumb gepeten haben. Der Brief ist geben nach Christi gepurd drewtzenhundert jar darnach in dem sibenvndnewntzigisten jar des nechsten Sontags nach vnser Vrawntag ze der Chounndunge.

Source Fulltext: OÖUB 11 (Wien 1983), S. 604-605