Wir Albrecht von Gots gnaden herczog ze Österreich ze Steyr ze Kernden vnd ze Krain graf ze Tyrol etc. bekennen, daz wir vnserm lieben getrewn Gundakern dem Starchemberger gelobt haben vnd geloben auch mit disem brief zu geben zwayhundert phunt Wienner phenning, die im von uns gepurent zu heyratgut zu der erbern Elsbeten der Hohembergerin, weilent der hochgebornen fürstinn vnsser lieben frawn vnd muter frawn Beatricen herczogin ze Österreich etc. hofjunkfrawn, seiner ehelichen hausfrawn, die er haben sol auf vnserm tail der vest zu Waldenuels vnd irer zugehörung in aller mass, als er vnd sein bruder Caspar von Starchemberg ander gelt auf derselben vest in saczweis habent nach lautt des sacz briefs, den in vnser lieber vetter herczog Wilhalm vnd wir vormalen darüber haben geben vnd als solichs sacz vnd lands recht ist vngeuerleich. Wer aber, daz wir den egenanten Gundakhern den Starchemberger oder sein erben der vorgenanten zweyr hundert phunt phenning beczalten vnd ausrichteten ee dann vnser vorgenanter vetter herczog Wilhalm vnd wir oder vnser erben den egenanten sacz vnssrer vestt zu Waldenuels loseten vmb solich gelt, darumb derselbe vnser vetter vnd wir denselben sacz den egenanten Starchembergern vormaln haben verseczt, so sol diser vnser brief dhain kraft mer haben in dhain weis, sunder derselb Gundakher von Starhemberg oder sein erben sullen vns den nach solicher beczalung widergeben an verczichen. Ob aber geschäch, daz vnser obgenanter vetter vnd wir den egenanten sacz mit einander losen würden, so sullen wir dem offtgenanten Gundakern von Starchemberg oder seinen erben derselben zwair hundert phunt phenning heyratsguts von vnserm tail allain phlichtig sein ze beczalen an geuerd, Vnd des ze vrchunt geben wir den brief versigelten mit vnserm anhangundem insigel, der geben ist ze Wienn an Eritag vor dem heiligen Auffarttag nach Kristi geburd drewczehenhundert jar, darnach in dem sibenvndnewnczigistem jare.

Source Fulltext: OÖUB 11 (Wien 1983), S. 614-615