Ich Fridreich der junge Stale gesezzen ze Piberstain vergich vnd tun kunt mit dem brieff vmb mein dyner Hainreichen den Spiesse Gotthart den Kirichdorffer, Hainreich den Payr, Hannsen Chawmer vnd Hannsen Hawtzen, die ze Wells gevangen gelegen sind, daz ich die yn soleicher mazze auzgesant habe, dacz sy in meiner herren lande von Österreich dehainn angriff noch anvelle nicht tun scholten. Vnd darvmb habe ich egenanter Fridreich Stale dem edeln herren herrn Reinprechten von Walsse hauptman ob der Enns genug getan vnd bin ym auch darumb gerecht worden. Auch habe ich versprochen bey meinen trewen an aydes statt, daz ich noch dehainer mein frewnde noch helffer noch nyman von meinn wegen gegen meinn herren von Österreich noch gegen iren lannden vnd lewten noch gegen nymen, der bey der egenanten meiner dyner vanknuzze gewesen ist, von derselben vanknuzze wegen dehain veintschaft noch vnwillen nymermer haben noch gewinnen sullen noch wellen in deheinn weg vngeuerleich. Auch versprechen vnd verhaissen wir die egenanten Hannsen Spiezze, Gotthart Kirichdorffer, Hainrich Mayr, Hanns Chawmer vnd Hanns Hawtz, daz wir mit vnsern herren von Österreich noch mit iren lannden und lewten nymmer mer nichz sullen noch wollen ze schaffen haben noch gewinnen one recht vnd in dehain weg vngeuerleich vnd auch dehain angriff noch anvelle yn der egenanten vnsern herren lande von Österreich nyman ane recht tun sullen noch wellen vngeuerleich, vnd haben auch versprochen vnd versprechen mit dem brieff, daz wir alle funff, alz wir vor genant sein, noch dehain vnser frewnde noch helffer noch nyman von vnsern wegen gegen vnsern herren von Österreich noch gegen iren lannden vnd lewten noch gegen nymen, der an vnserer vanknuzze schuldig, vnd dabay gewesen ist, von der ||
vanknuzze wegen dehain vereintschafft noch vnwillen nymmermer haben noch gewinnen sullen noch wellen, in dehain weg vngeuerleich. Auch haben wir alle, alz wir vorgenant sein vnd vns ygleicher besunder dem egenanten hern Reinprechten von Walsse mit vnsern trewn versprochen vnd verhaissen an ains aufgebotten geswornn aydes statt allez daz, so vorgeschriben statt stet, ze halten vnd ze haben trewleich ane allez geuer. Daz allez ze ainem waren vrchunde haben wir egenanten Fridreich Stale vnd Hainrich der Spiezze vnserew insigel gehangen an den brieff, darvnder wir vns vorgenanten Gotthart Kirichdorffer Hainrich Payr Hanns Chawmer vnd Hanns Hawtz aller vorverschriben sach verpinden, wann wir vnserew insigel bey vns nicht haben. Darzu haben wir alle, alz wir vorgenant sein, gepeten die erbern Engelharten vnd Ennderlein gepruder die Gruber vnd Wolfflein Espen, daz die auch irew insigel gehanngen habend an den brief durch vnsere vleizziger pet willen, in selber vnd ihren erben one scheden zu ainer gezewgnuzz vnd gedächtnuzze aller vorgeschriben sache, darvnder wir vns auch alle alz wir vorgenant sein, verpinden, alle vorgeschriben sache stet zu halten vnd haben trewleich ane allez geuer. Der brieff ist geben des nechsten Montags vor sand Mertinstag, do man czalt von Christi gepurt drewczehenhundert jare in dem syben vnd newntzigisten Jare.

Source Fulltext: OÖUB 11 (Wien 1983), S. 654-655