Ich Erasm der Wazmanstorfer vnd ich Hainzl von Au anstat meinselbs vnd anstatt meines bruedern khünder Hanseins von Au seeligen verichen offentlich mit dem brief fur vns vnd vnsern erben vmb alle die krieg stöss vodrung vnd misshellung, so wür haben hinz Wolfgang den Neidekher vnd Elsbethen sein hausfrau Albrechts des Harracher seeligen sun von der geltschuld wegen, so ihm Georg Harrocher vnser sunn vnnd vetter vnd sein erben schuldig sindt nach sag des geltbriefs, den sye von ihm vnnd seinen erben darumb habent, der da lauth vierthalb hundert pfundt Wiener pfennig, darumb wür vnd vnser erben selb gescholn vnnd porgen sein nach sag desselben geltsbrief, vnd auch von der zuespruch wegen, so wür hinz ina) haben, von der zwayer lehenbrieff wegen, die da lauten von herrn Jörgen von Walssee Albrecht dem Harrocher seeligen vnd sein erben sün vnd töchtern vber die guetter, die von ihm lehen sind vnd die gelegen sindt in dem landtgericht ze der Freynstatt, vnnd auch von der zuespruch wegen, so wür hinz in^a) haben mit dem spruchbrieff, der da lauth vom Engelharten dem Grueber anstat Elsbethen vnd Annen des obgenannten Albers des Harrocher seeligen khinder, vmb die obgenanten krieg stöss varderung vnnd misshellung haben wür vns lieblich vnnd freuntlich miteinander verricht nach piderleuth rhat in den puncten vnd rechten, so hernach verschrieben stent. Item von erst ist zwischen vns gesprochen^b) vnd getaidingt^c) wordten, das wür ihm kaufweis geben sollen alle die gueter, die von dem vorgenanten Geörgen dem Harrocher an vns geuallen sind, mit sambt den zwayen verlechten guettern vnd yberlendtäckher vnd auch das holz zu Eybenstain mit alle dew vnd^d) zu denselben guettern vnd holz gehört nichts ausgenommen, das alles lehens ist von den herren Jörgen von Walssee vnd gelegen in Freynstetter landtgericht, vnd sullen ihn vnd ihren erben darüber ain kaufbrief geben für vns vnd vnsere erben, damit sy versorgt sein nach dem landtrecht ob der Enns. Der sach zu ainem wahren vrkhundt vnd gueter gedechtnus geben wir ihn den brief besigelten mit vnser obgenanter bayder aufgedrukhten insigl fur vns vnd vnser erben vnd fur meines obgenanten Heinzlein von Au bruederkhindt, der gerhab ich bin. Der brief ist geben nach Christes geburdt dreyzehenhundert jahr vnd darauf in den sibenvndneunzigisten jahr an sand Simon vnd Judastag.

Source Fulltext: OÖUB 11 (Wien 1983), S. 652-653