Wir Wilhelm vnd Albrecht vettern von Gotes gnaden herczogen ze Österreich ze Steyr ze Kernden vnd ze Krain grauen ze Tyrol etc. bekennen vnd tun kunt für vns vnd vnser erben, daz wir vnserm getrewn lieben Remprechten von Walsse vnserm hauptman ob der Ennz gelten sullen vnd schuldig sein zway tausent phunt phenning, die er vns yetzunt berait gelihen hat vnd die den Rorren warden sind an irr geltschult, die wir in schuldig waren, vnd haben im vnd seinen erben dafür ingegeben vnd versatzt vnser veste vnd herschaft zum Pernstain wissentlich mit diesem brief mit allen den eren wierden gütern nuczen vnd gülten vnd mit sampt dem gerichte auf dem Mos vnd auch allem dem, so zu der vest gehöret, als wir haben inngehabt vnd von dem von Liechtenstain an vns komen ist, also, daz sy die von vns sullen innhaben vnd niessen von nu dem nächsten künftigen Weichnachten fünf jar, die nechst nacheinander koment, vnd vns alle jar czway hundert phunt phenning an der obgenanten summe abcziehen, daz pringt dieselben fünf jar tausend phunt phenning. Wenn sich auch dieselben fünf jare verlauffent, so haben wir vollen gewalt, die vorgenante vnsere veste von in zu losen vmb tausend phunt phenning, derselben losung sie nur vns oder vnser erben sullen stat tun vnd nyemant anderm vnd vns auch der gehorsam sein an alle widerred an vercziehen, wenn wir die nach den egenanten fünf jaren vordern. Wer aber, daz wir inner czwain moneden den nechsten nach yecz genanten vergangen fünf jaren die losung von in nicht tetten, so sullen sy die obgenante veste aber fünf jar darnach die nächsten nacheinander innhaben vnd nyessen, als vor vnd vns sullen zu gleicher weis dieselben jar jerkleichen an den obigen tausent phunten zway hundert, phunt auch abgen. Vnd wenn dieselben fünf jare aus sind vnd sich vergangen haben, so ist vns vnd vnsern erben die vorgenante veste zum Pernstain gar vnd ganczlich an alles gelt von in ledige vnd los vnd sullen vns auf der stat dann abtretten vnd vns oder wem wir dieselben veste emphelhen dann wider in antwürten an alles vercziehen vnd widerrede. Wir halten vns auch vor alle kirchlehen vnd ritterlehen, die von der obgenanten vnsser veste zu lehen sind. Der vorgenante von Walsse vnd sein erben sullen auch vnser veste daselbs mit gewondleichen paw innhaben, sunder sich auch der zins dienst vnd gewondleichen stewr, als von alter herkomen ist, von vnsern leutten lassen benügen vnd sy dawider nicht beswern. Auch sullen sy das obgenante gericht auf dem Mos inhaben, als oben begriffen ist. Der egenante Remprecht vnd sein erben sullen vns auch vnd vnser erben mit derselben veste zu allen zeitten gewertig vnd gehorsam sein vnd vns die offen haben, vns vnd die vnsern, die wir darczu schaffen, darin vnd daraus ze lassen vnd auch darin zu enthalten zu allen vnsern notdürfften, wenn vnd wie offt vns sein dürft geschichte wider aller menikleichen nyemand ausgenomen doch an ir merklich scheden angeuer. Auch mag derselb von Walsse dieselben veste verseczen oder machen, wem er wil, in dem rechten, als er die von vns inn hat, doch ainen der vnsern, der in vnserm lannde gesessen vnd vns damite gehorsam ist in allen sachen, als er vns selber schuldig wer nach sag dicz vnsers briefs, vnd wir sullen auch daz dann mit vnserm sundern brieven bestetten. Mit vrkund dicz briefs, daran wir vnsere baide insigel geschaft haben ze henken, datum etc. LXXXXVIII°.

Source Fulltext: OÖUB 11 (Wien 1983), S. 765-767