Ich Teseres Caspar Hanns Pilgreim gebrüder die Frowenhouer vnd all vnser erben verichen offenleichen mit dem brief von der brief wegen, da vns der jung edel wolgebarn graf Vlreich von Schawnberg vmb zuspricht, die vnser vater sälig inngehabt solt haben von graf Hainreichs saligen von Schawnberg seins vater, daz wir die ernstleich gesucht haben in aller vnser gewalt vnd der dehainen nicht envinden, sprechen wir dem vorgenanten graf Vlreich von Schawnberg vnd seinen erben, ob dieselben brief von iement auf chämen. wie daz wär, daz si dez gein vns vnd vnsern erben vnentgolten sullen sein aller statt. Dez ze vrchunt geben wir die obgenanten Frawnhouer für vns vnd vnser erben dem obgenanten graf Vlreich von Schawnberg vnd seinen erben den brief versigelt mit Chunrat dez Preysingärs die zeit vnser pfleger vnd mit vnsers lieben swagers Härtneitz des Chuchlaers ze Fridburg aigen anhangunden insigeln, dew si durch vnser fleizzigen pet willen an den brief gelegt habent in vnd irn erben an schaden, wann wir aigner grabner insigel noch nicht enhaben. Der brief wart geben nach Christi gepurd dreutzehen hundert iar vnd darnach in dem achtvndnewntzikchsten iar dez Phintztags vor sant Jörigen tag.

Source Fulltext: OÖUB 11 (Wien 1983), S. 691-692