Ich Thoman Zinispan ich Hanns Spieczer wir vergehen offenbar mit dem gegenburtigen spruch brief, als hinnder vns gegangen sind vnser lieb bruder vnd ohaym vnd ir swester, ||
das sind Chunrat Wenczel vnd Gangel dii Zinispan vnd Ursula die Spermaysinn, Angnes dye Stiegarinn, Warbara dye Martineyn vnserer frawn der herczoginn dyenarinn vnd Kathrey ain junchfraw ir swester auf ainem tail vnd Hans der Zinispan auf dem andern tail ir brueder, des wir paider tail hindergengbrif haben, von alles des guts wegen jnnemens und aufgebens nichts besondert noch ausgeczogen, so unser lieber vatter vnd ohaim säliger Chunrat der Zinispan den acht kindern geschafft hat, der ains mit dem tod abkangen ist in der zeitt, dy vorgenantten chinder er empholchen hat vnserm lyben bruder vnd ohaim Hannsen dem Zinispan jnnczehaben mit leyb vnd mit gut, dye weil vnd sew vnfogktpär sind, das er ier getrewer gerhab sein sol nach sag vnd laut seins geschäfft briefs, der da liegt in der purger chisten, darynn auch begriffen ist, wie der benant Hanns Zinispan den vorbenantten acht chindern von dem vorgenanten gut allew jar jarlich rayttum tun sol, die ich obgenanter Thomann Tzinispan vnd Hanns Spieczer, vnd etlich, die mit dem tod abgangen sind, an der chinnder stat aufnemmen scholten, als er vns des an seinem geschafftbrief in vnser traev empfolhen vnd getrawt hat. Nu habent vns die vorbenanten chinder vnd Hanns Zinispan vllizzichlich gepeten, daz wier die rayttum aufnämen nach irr hindergang brief sag vnd lawt. Das haben wir im czum mal getan vnd haben die vorbenantten rayttum aufgenomen von Hannsen dem Zinispan, daran vns wol genügt hat. Also sprechen wir obgenant spruchlawt, das sich dy obgenanten chinder auch daran genügen schullen lassen, wann wir nicht annders versten, denn das in von irem brueder Hansen dem Zinispan pillich vnd gleich geschehen sey. Von erst hat vns Hans Zinispan gelegt an dem rayttum beraitz gelcz sechczehen hvndert phunt, der czwelifthalb hvndert phunt gwesen sind havbtguts. So hatt er auf sew vnd auf ir gut gelegt von jrr notdurft wegen wol funf hvndert phunt, die er vns auch wissenlich vnd merkchlich verraitt hat zue allem dem erib vnd nuczen, das sew an verlechentem gut vnd freyem aygem habent. Nu sprechen wir, seind die kchinder habent sechczehen hvndert phunt phenning, das ydem kind gefallen sol, es sein svn oder töchter, tzwayhvndert phunt phenning, das ist den syben chinden vierczehn hvndert phvnt. Dann vmb dy czway hvndert des achteden kchindes tail, das gestorben ist, dy sullen eriben vnd gefallen, da sew durch recht hin eriben vnd gefallen sollen nach sag vnd lawt des geschephtpriefs, den Chunratt Zinispan darüber geben hat vnd sein tail anligunds guts, was das wringen mag. Auch sprechen wir, das die töchter das gut, das in Hanns Zinispan gechauft hat, das freys gut ist, das sullen sew gleich mitenander tailen vnd haben als das annder ir anligunds gut, das in ir vatter Chunrat der Zinispan lassen hat, vnd nicht annders damit hanndeln noch tun denn nach lawt vnd sag irs vatter geschäphtprief. So sprechen wir, was Hanns Zinispan der dreyer tochter, dy verheyrat sind, unez noch inne hat, die er in noch nicht geraicht hat, sider sew verheyrat sind warden vnd nicht pey im sind gewesen, das sol er in noch widerkeheren vnd geben. So sprechen wir noch mer, das Hanns der Zinispan den vir tochtern, als sew vor in dem prif werurtt sind, geben vnd raichen sol yder tochter ein silbreins trinkchvas, das wol sechs phunt wertt sey, von allen dem havsgerät vnd silbergeschir, das ir vater säliger lassen hat, des nicht vil gewesen ist. Wir sprechen auch, das Hanns der Zinispan junchfrawn Katherlein innehaben sol, als lang mit dem haws pewnten wisen vnd luzzen vnczt sy westatt wirtt, vnd hinfur czway ganczew jar vnd sol sey auch ausrichten vnd westatten, als das seinen eren vnd der frevntschafft wol anstet. So sprechen wir den drein brudern den sacz, der von jrr muetter vnd irem stevfvater her ist chomen, vmb die nevnczig phunt phenning, das sew den ledichlichen haben sullen voraws also, das in an iren sechshundert phunden nichcz sol abgen daran vnd sol Hans der Zinispan die nucz von demselben saczs das gegenburtig iar aufheben vnd nicht lenger. Auch sol Hansen dem Zinispan gefallen vnd weleiben ledichlich, was der vorgenanten kinder svn vnd tochter tail ist an Silbergeschirr vnd hausgerat. Auch ist ze merkchen, das die funff pruder miteinander chaufft habent von Pettern dem Met verlehents guts vmb sechczig phunt; da sprechen wir, das den drein brüdern daraus gefallen sol zu sampt irem verlehentem gut, das ir vaterleich erib ist, ir tail, was das bringt. So sprechen wir, das Hanns der Zinispan den Ruentingerhof vnd ain gut, dew er von der kinder mutter abgelost hat, innhaben vnd niessen sol von Weinachten schirist chunfftig vber drew ganczew iar vnd darnach sol der hof vnd das gut erben vnd gefallen, da sew durch recht hin erben vnd gefallen sullen, an allew widerred vnd an alles gut. Auch sprechen wir, welhew tochter oder sun irew czway hundert phunt phening zusampt irem vaterlichen erib in genomen hatt oder noch ynnemen sol, das sol Hannsen dem Zinispan darumb verquitten vnd sein eriben mit ainem guten quitprif, damit er vnd sein eriben hinfur wol versarigt sein. Wir sprechen auch, was Hanns Zinispan des werayten gelts noch ynn hatt von svnen vnd von tochtern, die er irs tails nicht aus gericht hat, sol ausrichten vnuerczogenlich czwischen hin vnd Weinachten. Auch sprechen wir, das der gegenburtig spruchbrif ligen sol in der puriger chisten ydem tail vnd eriben zu seinen notturfften; man sol in aber ayn tail on des anndern tail willen vnd wissen nicht herfur geben. Auch sprechen wir, welher tail des spruchs ausging ir ains oder menigers, welichs das wär, die der brif beruret vnd nicht stat hilt vnd volfuret vnd vns obgenanten spruchläwten darin yndert darumb nach sprach, es war Hanns der Zinispan oder die obgenanten siben chinder oder yemant von iren wegen, das wissentlich wurd, derselb tail hatt voraws allew seinew recht verlorn vnd sol darczue vnnserer genadigen fraw der herzoginn verfallen sein hundert phunt phening vnd vns spruchläwten czwayhundert phunt an allew gnad. Vnd der sach zu einem warenn vrkchundt vnd gutter gedachtnuss geben wir ich Thoman Zinispan ich Hanns Spiczer den gegenburtigen spruchprif wesigelten vnd bestätt mit vnser paider aufgedrukchten insigel. Auch haben wir vleissichleich gepeten den erbern ratt vnd die purger, das sew der stat insigel das mynner auf den brif gedrukcht habent zu gezeugnuzz der worhait, der stat vnd in an schaden. Gegeben nach Christi gepurd, do man zalt drewczehen hundert jar, darnach in dem newn vnd newnczigisten jar des Sampcztags nach vnser Frawn tag zu der Schiedung.

Source Fulltext: OÖUB 11 (Wien 1983), S. 847-850