Ich Kasspar der Hawnolt, ich Mathe der Hawnolt, ich Hanns der Hawnolt Hannsen Hawnolten säligen sün, ich Hans Hawnolt Vlreichs Hawnoltz säligen sun, veriehen vnuerschaidenleich und tun kunt offenleich mit dem brieff allen den, die in ansehent hörnt oder lesent, das wir mit wolbedachtem muet gedacht haben zu machen vnd machen auch wissentleich ain ewigen jartag mit dem brieff zu hylff vnd zu trost allen den seln, die aws dem geslächt der Hawnolten vnd ir aller hawsfrawn sein, die ye verschaiden sein oder noch hinfür verschaiden, vnd (allen) gelawbigen seln, also das man den begen schol zu vir czitten in dem jar am nagsten Phincztag abent nach yeder Chottember mit ainer gesungen vigilig des Freytag marigen mit ainer gesungen selmezz dacz der pharr vnd dacz den pruedern vnd schullen dacz der pharr sein bey der vigilig vnd bey den ambten, vnczt man gesingt, fünffczehen armew mensch vor sand Jacobs altar vnd schulten pitten vmb all voruerschriben seln vnd darczu schol man geben hincz der pharr wachslicht für zehen phenning vnd hincz den pruedern für acht phenning, die prynnen bey den ambten, vnd darnach geb man all Chottember dem pharrer virczkch phenning vnd ydem gesellen fünffczehen phenning vnd dem chaplan zu dem heyligen Geyst sechs phenning vnd dem schulmaister zehen phenning vnd den sundersiechen dreyzkch phenning vnd den voruerschriben fünffczehen armen menschen ygleichem vir phenning vnd das voruerschriben geschäft vnd jartag schol vns awsrichten hinfür ewichleich all Chottember die erbär pruederschafft der chramerczech, als vor verschriben ist an all abgeng. Darumb geben wir in die hernach verschriben gueter, von erst ain gut genant auf der Strazz, da di czeit Nycl Czerrer auftgesessen ist, gelegen in Grieschiricher pharr, vnd ain guet dapey in Puchlär pharr genant in der Varlgrub, da di czeit Hainreich Varler auftgesessen ist, vnd ain guet dacz den Schickchen in Puchiricher pharr vnd ain guet dacz Aych gelegen in Talhaymer pharr vnd ain guet genant ym Prannt gelegen in Lochkiricher pharr in aller der weis, vnd wir die selber inn gehabt haben, also schullen si die hinfür ewikleich vnuerchumert inn haben nuczen vnd nyessen vnd haben in die ingeantwurt aws vnser nucz vnd gewer in ir nucz vnd gewer für bas chainen zwspruch dar noch nicht mer ze haben in chainer weis vnuerczigen des benanten jartag. Es sind auch die voruerschriben gueter alle rechtz aygen, vnd der sew wir ir gewern vnd fürstand für all ansprach, wo in des not geschiecht, also rechtz aygens vnnd des landes recht ist ob der Enns. Hieten si darinn icht abgangs, den schullen si haben dacz vns vnuerschaidenleich vnd auf aller vnser hab, wo wir die haben gebinnen oder lassen versuecht vnd vnuersuecht. Des zu vrkunt geben wir in den brieff versigelten mit vnser obgenanten Hawnolten aller vierer anhangenden insigeln. Der brieff ist geben nach Kristi gepurd drewczehen hundert jar vnd in dem newnvndnewnczkchisten jar an sand Nyclastag.

Source Fulltext: OÖUB 11 (Wien 1983), S. 873-875