Ich Andre der Perkchaimer vnd all mein erben ains tails vnd Anna Wenczleins dez Prehafen säligen witib vnd Albrechtz des Marschalichs swester vnd all mein erben dez andern tails vergehen, daz wissentleich zwischen vnser beredt ist warden vmb die zuspruch, so ich gehabt hab hintz der egenannten Annen vmb all die geltbrief, die dem egenannten Prehafen gelawtt habent oder noch lawtent vnd darumb ich ir zu hab gesprochen, diselben brief sol die vorgenant Anna an vercziehen gen Linncz nyderlegen mit mainem wissen hincz ainem gemainen mann, da wir sew auf paiden tailn wissen ze vinden, vnd sol dann ich obgenanter Andre Perkchaimer vnd ich ebenantew Anna die sach vnd brieff aribaitten zu paider seytt angeuär, damit wir die geltschuld inpringen. Ez mag auch vnser yetweder tail wol ainen darczu schaffen oder geben, der die sach an seiner stat aribait, ob vnser yetweder tail oder vnser ainer daz selb nicht wolten oder möchten tun. Vnd waz si dann geltz von den briefen möchten inpringen vber die zerung, daz schullen sew oder wir dacz dem frummen mann nyderlegen, da die brief ligent. Ez sol auch vnser yeder tail, der der brief bedarf, dem mann, der die brief inn hat, vergewissen, daz er im die brief wider antwurt oder die pfenning, darumb er die brief ze lösen geit, vber sein zerung. Vnd wann vns dann ze paiderseitt fuegleich ist, so sol ich vorgenanter Perkchainer vnd ich egenantew Anna yeder tail ainen frewnt oder zwen darczu geben vnd den vnser sach fürbringen vnd zu erchennen geben vnd die schullen dann besehen, ob si vns mit der mynne berichten mugen. Möchten si vns aber miteinander nicht berichten, wie si ez dann lassent zwischen vnser, daz sullen sew dann pringen an die edlen vnser genädigen herren hern Eberharten von Kappellen vnd an hern Reinprechten von Walsse hawbtmann ob der Enns. Die mugen dann zu in nemen, wen si wellent, vnd waz die darawz machent vnd tunt, da schullen wir zu paiderseitt ich obgenanter Perkchaimer vnd all mein erben ains tails vnd ich vorgenantew Anna vnd all mein erben dez andern tails gentzleich pey beleiben vnd stät haben vnd nichtcz dawider tun noch reden in chainerlay weis angeuär. Vnd des zu vrchund vnd güeter gedectnuzz gib ich vorgenanter Andre der Perkchaimer den brief besigelten mit mainem aygen anhangenden insigel; darczu han ich vleizzichleich gepeten meinen lieben swager Maricharten den Pewnhalm, daz er der sach geczewg ist auch mit seinem angehangen insigel im vnd allen seinen erben an schaden. Der brief ist geben an dem nachsten Eritag vor dem heyligen Weinachttag, do man zalt von Christi gepurde drewtzehen hunndert jar vnd darnach newn vnd newnczigistem jar.

Source Fulltext: OÖUB 11 (Wien 1983), S. 880-881