Ich Hainreich der Schuster mein hausfraw vnd all vnser eriben veriechen offenbar mit dem brief allen den, die in ansehent hörent oder lesent, daz wir mit wolbedachten mut vnd mit gutlichem vnserm willen recht vnd redlich eribrecht gechauft haben mit der chraft dez brifs auf einem jauch ackers ze Eisengering von vnserm herren Gorigen dem Fränckinger von seiner hawsfrawn vnd allen iren eriben gelegen ist in Ostermutinger pfarr in dem Weilhartsgericht vnd auch lechen ist von im mit allen eren rechten gulten nutzen vnd gesuchen, die darzu gehörent vnd da von bechommen mugen besucht und unbesucht vmb ein solich gelt, dez si von vns wol genügt hat, gar vnd gäntzlich gericht vnd gewert sind, nach allem iren willen, also mit der beschaiden, daz wir in allew iar iärlich dienen vnd geben sullen auf sand Michelstag viertzehen tag vor oder in den nachsten viertzehen tagen hinnach sechs schilling pfenning, sechzig ayer, prot vnd chäs für acht pfenning zway hüner zwen puntschuch an daz iaid oder daz gelt dafür, daz dann gib vnd gab ist an allen abganch. Wir sullen auch allew jar järlich in ir stift gen vnd ain viertail weins auf den tysch. Auch sullen wir in wericharten alz ander ir hintersaczen. Wir sullen auch allew iar sechs fuder holcz nemen ab dem Hartperg. Wär aber, daz wir in dez vorgenanten dinst vnd zins, es sey groz oder chlain, alz ez oben mit nam ist verschriben, verczugen vnd nicht auf die vorgenant zeit auzrichtäten vnd in nicht gehorsam wern an der vorgenanten werichart, wietann schaden si irs vorgenanten dinst vnd gült vnd der werichart nämen, den mugen si haben datz vns dem vorgenanten Hainreich dem Schuster datz seiner hausfrawn vnd allen iren eriben vnd auf aller vnser hab, swo wir die haben oder darauf chömen, da mugen sie vns wol darumb pfenten alz ander ritter vnd chnecht an allez recht oder wie sew verlust. Wir sullen in auch daz vorgenant gut stiftlich vnd pawlich legen. Si sullen auch dez vorgenanten eribrechtz vnser gewer sein, alz dez landez recht ist. Wär aber, daz vns not geschäch, daz wir daz eribrecht versetzen verchumern oder verchaufen müsten, daz mügen wir wol tun, aber mit irem willen vnd rat, wem wir wellen, ein erbergen pawmann, der dem gut alz wol getun mag alz wir selben. Vnd wollten wir mit in oder si mit vns vmb der artikel vnd punt ainen oder mer ze recht oder ze chrieg chämen mit gaistleichen oder werltleichem recht, daz sullen si allez behabt haben vnd wir ez gein in verloren. Swer auch den brif mit irem guten willen inn hat, dem sein wir allez dez schuldig vnd gepunden, alz in selben, daz oben an dem brif ist verschriben. Vnd dez ze einem waren vrchund vnd stätichait geben wir in den brif vnder Hainreich dez Acher zu den zeiten pfleger ze Wildtzhut vnd forstmaister in dem Weilhart insigel versigelten, der daz durich vnser vleizigen gepet willen an den brif gehengt hat, im vnd allen seinen eriben an schaden, darvnder wir vns verpinden mit vnsern trewn, allez daz stät ze haben, daz der brif lawt. Vnd der gepet vmb daz insigel sind zewgen Fridreich Treiber von Mitterndorf Hainreich Weitenhüliger, Chonrad von Pidenpach vnd ander aerberg lewt genug. Daz ist geschehen, do man zalt von Christi gepurt drewtzehen hundert jar vnd in dem newnvndnewntzigistem jar dez Pfincztags vor aller heyligen tag.