Martinus episcopus servus servorum dei dilectis filiis abbati monasterii sancti Egidii Nurenbergensis et sancti Spiritus Heidelbergensis Bambergensis et Warmaciensis diocesium ac sancti Gungolffi Maguntinae ecclesiarum decanis salutem et apostolicam benedictionem. Regnum presidentes universalis ecclesie pro fidelium presertim religiosorum ac piorum locorum et ecclesiarum quarumlibet statu salubriter dirigendo, prout ex debito nobis iniuncti pasto- ralis tenemur officii, sollicite consideracionis intuitum extendimus et ad ea, per que cuiusvis dispendii sublata materia illorum indempnitatibus consulitur, libenter adhibemus nostre sollicitudinis partes. Sane pro parte dilectorum filiorum magistri et fratrum hospitalis beate Marie Theotonicorum Ierosolimi- tani nobis nuper exhibita peticio continebat, quod, licet ipsi iuxta specialia eis a sede apostolica concessa privilegia, quibus in aliquo derogatum non exi- stit, ad parrochiales ecclesias et alia beneficia ecclesiastica, in quibus ius ob- tinent patronatus sive presentandi, cum illa vacare contigerit, personas ydo- neas locorum ordinariis iuris ordine observato presentare ipsique ordinarii per- sonas easdem ad ecclesias et beneficia huiusmodi sic presentatas sine aliqua contradictione seu exactioue admittere et eas in rectores ecclesiarum et bene- ficiorum instituere consueverint antedictorum, nonnulli tamen ex ordinariis

ipsis contra magistrum et fratres predictos novum et illicitum gravacionis et exactionis modum exquirentes personas huiusmodi eis ad ecclesias et beneficia predicta per eosdem magistrum et fratres presentatas admittere et in eorum rectores instituere indebite recusant, nisi persone ipse medietatem seu certam aliam quotam fructuum et proventuum primi anni ecclesiarum et beneficiorum predictorum dictis ordinariis, ad quos huiusmodi institucio communiter vel divisim pertinet, persolverint in ipsorum magistri et fratrum ac personarum non modicum preiudicium et gravamen. Quare pro parte dictorum magistri et fratrum nobis fuit humiliter supplicatum, ut super premissis eis de oportuno remedio providere de benignitate apostolica dignaremur. Nos igitur, quorum desideriis insidet fratres ipsos ab oppressionibus quibuslibet tueri, huismodi supplicationibus inclinati discrecioni vestre per apostolica scripta mandamus, quatenus vos vel duo aut unus vestrum per vos vel alium seu alios omnes et singulos ordiuarios predictos, eciamsi archiepiscopali, episcopali vel alia quavis prefulgeant dignitate, ad quos admissio personarum et institucio recto- rum huiusmodi communiter vel divisim pertinet aut pro tempore pertinebit, ut a percepcione medietatis seu quote fructuum et proventuum ecclesiarum et beneficiorum huiusmodi necnon aliis exactionibus et gravaminibus penitus abstinentes omni difficultate cessante personas ydoneas, quas prefati magister et fratres ad ecclesias et beneficia supradicta, in quibus ut prefertur ius ob- tinent patronatus sive presentandi vacancia et imposterum vacatura duxerint presentandas, prout ad eos communiter vel divisim pertinuerit, impedimento cessante legittimo, pure libere et absque aliqua exactione admittere et in eorum, ad que sic presentate fuerint, ecclesiarum et beneficiorum rectores instituere non postponant, quocienscumque opus fuerit, auctoritate apostolica per censu- ram ecclesiasticam compellere et nichilominus si illi, ad quos huiusmodi in- stituciones pertinuerint debitis non contenti iuribus absque alterius vexationis sive exactionis onere personas huiusmodi in ecclesiis et beneficiis predictis ad que presentate fuerint pro tempore instituere recusaverint sive infra compe- tentem eis super hoc per vos aut unum vestrum statuendum peremptorium terminum distulerint, extunc, ne occasione vacacionum earundem huiusmodi ecclesie et beneficia in spiritualibus et temporalibus detrimenta paciantur ad instituciones procedere antedictas omnes et singulas excommunicacionis, suspen- sionis et interdicti sententias, quas propter premissa in magistrum, fratres et personas presentandas necnon ecclesias et beneficia huiusmodi per ipsos ordi- narios quomodolibet promulgari contigerit, irritas et inanes decernere et de- clarare curetis, non obstante, si eisdem ordinariis vel quibusvis aliis com- muniter vel divisim a sede apostolica sit indultum, quod interdici, suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mentionem. Da- tum Viterbii viii kal. octobris pontificatus nostri anno tercio.

IV, 248.