Honorius episcopus s. s. d. venerabilibus fratribus archiepiscopis et epi- scopis etc. Gravis illa et nimis dolenda ruina, quam dilecti filii fratres hospitalis sancte Marie Theutonicorum Ierosolimitani pro defensione fidei chri- stiane diebus novissimis pertulerunt, illum debet ipsis et suis domibus in oculis omnium impetrare favorem, ut ad eorum consolationem et remedium tam im- portabilis excidii detrimento pie compassionis adhibende obtentu singuli sponte currere debeant potius, quam aliorum expectent suggestionibus invitari. In hoc

enim articulo per experimenti certitudinem evidentius apparebit, quis zelum dei habeat, quis iniuriam populi christiani et tam enorme orientalis populi detrimentum pro amore domini et fidei christiane constantia desideret pro- pulsari. Cum igitur retributionem largitatis exoptare divine secura confidentia valeat, quisquis tam gravis necessitatis articulo predicte domui ad tanti repa- rationem exterminii subsidium de bonis temporalibus studuerit impertiri, uni- versitatem vestram hortamur in domino, rogamus etiam attentius et manda- mus, quatenus subiectos vestro regimini populos moneatis et per urgentissime pulsationis instantiam inducatis, sicut fieri posse celerius et commodius cogno- scetis, ut ob peccatorum suorum remissionem non eis tantum, sed potius universitati catholice de bonis suis, que de manu divini beneficii perceperunt, subsidium non differant exhibere. Res enim tam urgentis et immensi discri- minis moram non patitur, sed in ictu oculi, si posset fieri, remedium exigeret festinatum. Datum Laterani vi idus februarii pontificatus nostri anno quinto.

Sine dato: II, 102v. n. 46; A. 20 n. 44 Latine et Germanice. — Cum dato: In transsumto complurium bullarum, d. d. Wiennae 1396. aug. 18 in archivo Regimontano, cf. Napiersky I, 5 n. 16; edidit Duellius II, 5 n. 4. Originale, cum bulla in filis sericeis pendente, ut iam dudum etiamnunc Vindobonac in archivo ordinis Theutonici.