Martinus episcopus servus servorum dei ad futuram rei memoriam. Paterne consideracionis perscrutantes indagine multiplicia dilectorum filiorum magistri et fratrum hospitalis beate Marie Theotonicorum Ierosolimitani merita et eorum felicem laudibus et honore dignissime religionis successum sinceris contemplantes affectibus illa libenter apostolici roboris firmitate communire satagimus, que pro conservandis ipsorum magistri et fratrum iuribus et inten- dendis eorum comodis ac profectibus digesto processisse liberamine recensemus. Sane pro parte dictorum magistri et fratrum nobis nuper exhibita peticio continebat, quod olim carissimus in Christo filius noster Sigismundus Roma- norum rex illustris eorundem magistri et fratrum statui et indempnitatibus providere gestiens inter alia auctoritate regali statuit et ordinavit, quod ipsi magister et fratres presentes ac futuri omnes et singulos eorum necnon dicti

hospitalis proprios homines ab ipsis pro tempore in quibusvis locis reperiantur infra anni spacium repetere possint ac locis presidentes eisdem fugientes et repetitos huiusmodi magistro et fratribus prefatis omni mora et contradictione propulsis restituere debeant ac teneantur, quodque de excessibus et iniuriis, quos subditi et ascripticii necnon servitores familiares et officiales magistri ac fratrum predictorum pro tempore perpetraveriut in locis discuti debeat in quibus ipsi excessus et iniurie fuerint commissi necnon hospitale et fratres huiusmodi aut eorum homines de structuris, municionibus et fossatis, in qui- busvis locis et ex quibuscumque graciis, privilegiis, concessionibus pro tempore faciendis nullum debeant in suis iuribus, libertatibus, privilegiis et observanciis dampnum vel preiudicium sustinere, mandans rex ipse omnibus et singulis sibi et imperio subditis ut huiusmodi statuta et ordinaciones manuteneant ac defendant nec contra illa dictos magistrum et fratres quomodolibet molestent sub quinquaginta marcharum auri puri pena pro una camere imperiali et alia medietatibus magistro et fratribus predictis irremissibiliter applicanda, prout in quibusdam auctenticis in vulgari patrie illius ydeomate desuper confectis litteris ipsius regis sigillo munitis quarumque substanciam et effectum nullo addito vel detracto, quod facti substanciam huiusmodi alteret vel immutet per nonnullos in talibus expertos fideliter elici et transferri ac post diligentem eorum in cancellaria apostolica de nostro mandato subsecutam examinacionem de verbo ad verbum presentibus inseri fecimus lacius extensiusque prospicitur contineri. Quare pro parte dictorum magistri et fratrum nobis fuit humiliter supplicatum, ut ipsis statutis et ordinacionibus pro illorum subsistencia firmiori robur apostolice confirmacionis adiicere de benignitate apostolica dignaremur. Nos igitur eisdem supplicacionibus inclinati statuta et ordinaciones huiusmodi ac quecumque inde secuta rata habentes et grata illa auctoritate apostolica ex certa sciencia confirmamus et approbamus presentisque scripti patrocinio com- munimus. Tenor vero effectus litterarum huiusmodi talis est:

„Nos Sigismundus cet. (supra n. 293 p. 260). Datum Constancie anno a nativitate domini millesimo quadringentesimo quinto decimo, die proxima Mer- curii ante festum sancti Iohannis Baptiste, regnorum nostrorum Ungarie etc. vicesimo nono et Romanorum quinto".

Nulli ergo omnino hominum liceat hanc paginam nostre confirmacionis, approbacionis et communicionis infringere vel ei ausu temerario contraire-. Si quis autem hoc attemptare presumpserit, indignacionem omnipotentis dei et beatorum Petri et Pauli apostolorum eius se noverit incursurum. Datum Rome prope sanctos apostolos viii idus novembris pontificatus nostri anno duodecimo.

IV, 250 et 257. Transsumtum de 1434 iulii 9 cf. n. 718 de 1431 febr. 18.