Gregorius episcopus servus servorum dei universis Christi fidelibus, ad quos littere iste pervenerint, salutem et apostolicam benedictionem. Dilecti filii fratres hospitalis sancte Marie Theutonicorum in Ierusalem, novi sub tem- pore gracie Machabei, abnegantes secularia desideria et propria relinquentes, tollentes crucem suam dominum sunt secuti. Ipsi sunt, qui orientalem eccle- siam a paganorum spurcitia liberare et christiani nominis inimicos expugnare nituntur; ipsi pro fratribus animos ponere non formidant et peregrinos ad sancta loca proficiscentes tam eundo quam redeundo ab incursibus paganorum defensare conantur. Sane, sicut dilectus filius Hermannus, magister hospitalis ipsius, in nostra proposuit presentia constitutus, ad tam sanctum et pium opus laudabiliter prosequendum in terra, quam nobilis vir dux Austrie predictis fratribus emit intuitu pietatis, castrum Montfort iuxta territorium Acconense edificare ceperunt, positum in confinio paganorum, per quod christianis in par- tibus illis immensa dinoscitur utilitas provenire, cum quasi quoddam frenum Sarracenos compescens ab insultibus consuetis fidelibus circumquaque securam tribuat libertatem; quia vero pre multitudine continua expensarum, que ipsis pro terre sancte subsidio et precipue pro refectione pauperum et necessitatibus infirmorum imminent faciende, ad perficiendum et regendum castrum predictum proprie ipsis non suppetunt facultates, sed, ut perfecte firmetur et potenti manu regatur, ipsis est fidelium suffragium oportunum, presertim cum sit a mari remotum, cui sicut ceteris civitatibus et munitionibus regni Ierosolimitani per mare non potest de succursu necessario provideri; universitatem vestram mo- nemus et hortamur in domino in remissionem peccaminum vobis1 iniungentes, quatenus eisdem fratribus vel eorum nuntiis, cum ad vos accesserint, ad opus huiusmodi grata pietatis subsidia impendatis, ut per subventionem vestram perfici et conservari valeat castrum prefatum, ac3 vos per hec et alia bona, que domino inspirante feceritis, ad eterne possitis felicitatis gaudia pervenire. Nos autem3 de omnipotentis dei misericordia et beatorum Petri et Pauli apo- stolorum eius auctoritate confisi, omnibus, qui de bonis sibi collatis a deo in hoc subvenerint fratribus memoratis eisque beneficia persolverint, annuatim septimam partem iniuncte penitentie relaxamus, presentibus post decennium minime valituris. Datum Laterani vi° idus iulii pontificatus nostri anno quarto.

Inveni apographum in Heinrici Guilclmi Schulz Dresdensis schedis cum nota: Carta sciolta n. 53 Baldanus'; videtur ex Neapolitano archivo depromtum. — In copiario Regimontano A. 16 p. 46 inter papalia, quae Baruli in domo Theutonica inveniebantur; contulit v. cl. Meckclburg. 1. vobis peccaminum Sch. 2. castrum ipsum et A. 16. 3. enim Sch.