Jch Jensel, weilen schreiber Vlreichs des Winner vnd ammans in dem Lauental, vergich mit disem prief vnd tuen chunt allen den, die i sehent, horent oder lesent, daz ich mit wol bedachten mueete vnd mit meiner vreunte rat, zue der tzeit, due ichs mit rechte wol getuen mocht, han ledich lazzen mein geswein Mathen, pei den zeiten stat schreiber ze Marchpurch, vnd sein hausuraun Katerein vnd ier paider erben vmb die an sprach, die ich han gehabt auf dem halben haus, da si inne sint datz Marchpurch vnd daz gelegen ist ze naest pei Otleinz haus dez chuersner vnd auch auf den halben weingarten, der gelegen ist in der Grozzen Zweinich, wand si mier dar vmb geben habent ain vaz weinez in ainlef empern, also mit auzgenommer rede, daz ich, der vergenante Jensel, noch mein erben vuerbaz nach dem vorgenanten halben haus vnd nach dem egenantem halben weingarten noch vmb dahainerlay sache, ez sey chlain oder grozz, wie ez genant sei, chain ansprach noch rechts hintz in dar vmbe schuellen haben noch enmuegen. Daz in dicz also stet vnd vmbuerprochen peleib, an allez geuerd, dar veber gib ich in disen prief mit Wilhalms dez Reinsperger, ze den tzeiten richter ze Sand Andre, anhangenten insigel vnd mit dez vorgenanten Vlreichz, dez ammans in dem Lauental, anhangenten insigel versigelt zue einem stetem vrchuend der warhait, die in vmb ier insigel gepeten han, wand ich selb nicht aygens insigele han. Des sint getzeug her Walchuen, chorher ze Sand Andre, her Vlreich, chorher zu Volchenmarcht, Herman der Plenchel, Wetzel, decz Wienner suon, Vlreich der sneider, Herman der Valcher, Nycla der Streicheisen vnd ander erber leute genuech, den es wol gewizzen ist. Ditz ist geschehen vnd ist diser prief geben ze Sand Andre nach vnsers herren Christes gepurd dreutzehen hundert jar, dar nach in dem fuemf vnd dreyzzichsten iar, dez naestem mittichens nach sand Merten tage.