Venerabili in Christo patri ... dei gratia episcopo Pataviensi frater Guido miseratione divina tituli sancti Laurentii in Lucina presbiter cardinalis apostolice sedis legatus salutem et sinceram in domino karitatem. Eam de sinceritate vestra fiduciam gerimus‚ ut devocionem quam ad nos geritis‚ extendatis ad illos quos nobis unit affectio amicicie specialis. Hinc est quod, cum nos dilectis nobis in Christo preposito Sancti Ypoliti et conventui eiusdem loci ordinis sancti Augustini vestre diocesis propter eorundem indigenciam et hospitalitatis onera que singulis diebus sustinent, ut pote in conmuni transitu constituti, ut ecclesiam parrochialem de Pruka ^a et redditus ipsius ecclesie cum suis pertinentiis, in qua iidem prepositus et conventus ius obtinent patronatus, quando eam vacare contigerit, licite retinere ac libere perpetuo possidere valeant, auctoritate qua fungimur, duxerimus indulgendum, vestro dumtaxat ad id accedente consensu, benigne paternitatis vestre clemenciam, de qua fiduciam gerimus pleniorem, affectuose requirimus et rogamus, quatenus nostrorum obtentu precaminum quod a nobis in hac parte factum est ratum et gratum habentes eisdem preposito et conventui sine difficultate qualibet benignum prebeatis assensum; tantum inde facientes‚ quod predicti prepositus et conventus preces nostras apud vos sibi senciant profuturas. Datum Vienne XVI. kalendas iunii, pontificatus domini Clementis pape IIII. anno tertio

Source Fulltext: LAMPEL, Urkunden Sanct Pölten (=FRA I, Wien 1981) S. 109-110