Goetfridus dei gracia ecclesie Pataviensis episcopus omnibus imperpetuum. Inter cetera loca divino cultui deputata, que ex suscepti cura regiminis nos decet adtollere‚^a honorabilem ecclesiam sancti Yppoliti, quam singularis prerogativa favoris amplectimur et speciali pre ceteris prosequimur caritatis^b affectu, affluencius respicere volumus muneribus graciarum. Sane quia predicta ecclesia, que quondam in requie floruit opulenta, cum ex hospitum crebro transeuncium receptione continua cum ex construccione muri quem^c pro congruo et oportuno loci munimine non absque impensis sumptuosis edificat, ad tantam egestatem collapsa pervenit, quod aliquali consolacionis et gratie nostre subsidio, ne in perpetue destruccionis precipicium prolabatur, necessario indiget sublevari, nos ad eam interne compassionis oculos dirigentes, pro nostro memoriali perpetuo nec non ob spem retribucionis eterne, quam consequi non ambigimus ex huiusmodi operibus pietatis, dilectis in Christo E. preposito et fratribus eiusdem ecclesie, qui cottidie celestia contemplantur, benigne concedimus et liberaliter indulgemus, quod ecclesiam de Ponte, ad quam habent presentare de iure, in suorum relevacionem defectuum habeant et retineant mense ipsorum perpetuo serviendam, ita tamen quod post mortem vel resignacionem liberam Hainrici plebani¹ qui nunc eidem preest ecclesie memorati prepositus et conventus ad eam perpetuum vicarium nobis vel successoribus nostris presentent, qui in ipsa ecclesia spiritualium sollicite curam gerat. Huiusmodi autem vicario pro sustentacione sua oblaciones, sive questum cottidianum eiusdem ecclesie nec non decimales denarios cum decimis minutis, item vineas et decimas vinearum accuriam in civitate, quintam eciam partem maiorum decimarum omnium quas eadem ecclesia habuit ex antiquo maturo ac provido de liberacionis nostre consilio deputamus. Ipse vero prepositus omnes dotes cum universis suis iuribus et redditibus ac omnes decimas maiores preter quintam partem assignatam vicario nec non aream extra civitatem, eam scilicet in qua sue decime reponi hactenus consueverunt, pro suis et conventus sui utilitatibus retinebit. Pro huiusmodi autem beneficencie nostre donis predicti fratres patri gratiarum altissimo condigne devocionis et laudum libamina rependentes inantea, festum sancti Maximiliani ad modum summi festi sollempniter celebrabunt et quilibet eorum perpetuo ante incepcionem hore cuius libet dicet salutationem angelicam, videlicet »Ave Maria«.^d2 Ipsi eciam fratres pro nostra salute ac boni status augmento iugiter de votos precum manipulos et gratas orationum suarum victimas summon patri luminum immolabunt‚ anniversarium nostrum, quam cito deo vocante nos continget decedere, tanquam sui confratris devocius perpetuo peracturi. Et ut ipsi aliqualiter consolati predicta libencius et alacrius exequantur, eis sex libras et custodi pro luminaribus mediam libram in supradicte ecclesie dotibus et decimis maioribus ordinamus: videlicet tres libras et sexaginta denarios in festo sancti Maximiliani predicto et tres libras et sexaginta denarios in capite ieiunii, quoad vixerimus, pro fratrum consolacione oblaiario^e et custodi per prepositum, qui pro tempore fuerit, expedite annis singulis persolvendas. Nobis autem sublatis de medio predicte tres libre et LX denarii, qui solvebantur in capite ieiunii, in obitus nostri anniversario persolventur. Hec autem omnia memoratus prepositus se firmiter et inviolabiliter servaturum prestito iuramento promisit, et atres prefati iuraverunt et recipiendi iurabunt, quod prepositis ipsorum^f successive futuris nullam obedienciam faciant, nisi prius sub iuramento suo se obligent ad observanciam premissorum. In quorum testimonium et perpetui roboris firmitatem presens scriptum exinde conscribi et sigillo nostro iussimus communiri. Datum in Sancto Ypolito, anno domini millesimo ducentesimo octogesimo^g quarto, feria secunda post Quasi modo geniti, pontificatus nostri anno secundo.

Source Fulltext: LAMPEL, Urkunden Sanct Pölten (=FRA I, Wien 1981) S. 148-150