Ich Seifrid der shench^a von Wolfsperch und ich Dietmar und ich Durinch^b sein brueder wir verjehen und tuen chunt allen, den di disen brief lesent oder hoerent lesen, di nu lebent und hernach chumftich sint, daz wir mit verdachtem muet und mit veraintem rat und mit guetem willen unser hausvrawen und unser erben und aller unser vreunt sechzechen metzen habern, di wir gehabt haben von zwæier lechen vogtaie ze Pheffinge, von welchen zwain lechen di erbern herren ze Sant Polten zechen und siben shilling phennich dienst manich jar habent enphangen, di auch in unser vodern auf ir oblaie habent geshaft ze ir jartagen, di selben vorgenanten sechzechen meczen habern hab wir verchauft ledichleich an alle chumf tich ansprach mit allem dem recht als wir sev in nucz und ingewer manich jar und tach haben^c herpracht, dem erbern herren hern Weiganten ze den zeiten guster ze Sant Polten an seines prelates stat probst Ekhartes ze den zeiten probst und aller seiner herren ze Sant Polten, umb drev phunt phenning wiener munz, der wir recht und redlich gewert sein. Und hat auch der vorgenant her Weigant chorherre und guster ze Sant Polten die vorgenanten sechzechen metzen habern an seins prelates [stat^d] probst Ekhartes und aller seiner herren ze Sant Polten stat und namen gechaufet auf di oblaie seiner herren ze Sant Polten durch seiner swester sun sel willen hern Chunrates dem got genad, der di vorgenanten drev phunt phenning und auch ander guet hinder im lie und auch auf di oblaie des vorgenanten gotshaus ze Sant Polten schuef an seinem toet, also daz die vorgenanten herren ze Sant Polten, di nu lebent und di hernach chumftich sint, furbaz ewichleich sein gedenchen schullen an seinem jar tag mit vigili, mit messesprechen und mit ander guetat^e die sev in alter gewanhait manigen tag habent herpracht und auch erzaiget habent und nach erzaigent allen den di irem gotshaus icht gutes habent getan oder tuent. Und daz diser chauf und disev wandlung furbaz innmer^f stet und unzebrochen beleib, daruber geb wir, ich der vorgenant Seifrid der schench von Wolfsperch und ich Dietmar und ich Durinch des vorgenanten hern Seifrides brueder dem erbern herren hern Weiganten und seinem goteshaus ze Sant Polten disen brief versigelten mit unsern insigeln und mit hern Wlfinges insigel von Wald mit sampt den erbern zeugen, der namen hernach geschriben sint, den dieser chauf wol chunt und gewizzen ist. Daz ist: der erber herre herr Trost probst ze Herczogenburch, her Tristram probst ze Sand Andre,hern^g Christan von Viehofen, her Weikhart von Topel, her Gundaker von Retelperg, her Meinhart von Reut, her Gotfrid von Toczenpach, her Rudolf von Toczenpach, Engelshalch der amman‚ Andre der Molle und ander leut genuech, den disev sache und diser chauf wol chunt und gewizzen ist. Der brief ist gegeben dacz Sand Polten, du von Christes gepurd warn ergangen dreuzechenhundert jar und darnach in dem aindleften jar, des phinztages an sand Merteins tag.

Source Fulltext: LAMPEL, Urkunden Sanct Pölten (=FRA I, Wien 1981) S. 228-229