Ich Beigant und ich Chalhoch wir zwen brueder genant di Haechel, gesessen dacz dem Wasen, und alle unser erben wir verjehen und tün chunt allen den di den brief an sehent oder horent lesen, di nu lebent und hernach kunftich^a sind, das wir mit verdachtem muet und mit guetleichen willen und gunst aller unser erben, nach rat unser besten frewnt und mit gesampter hant, zu der zeit do wir iz wol getuen mochten, haben ze kaufen geben dem erbern man Altman von Waczmanstorf und seiner hausfrawen ver Sweygmuten und ir baider erben alles daz güt das wir haben^b gehabt ze Oxdorf ze vel^c und ze dorf, gestift oder ungestift, als wir iz und unser vadern her haben bracht in rechter aigens gewer, versucht und unversucht, wie so das genant ist, also hab wir in's geben ledikleich ze rechten frein aigen umb sechzikch phunt phenning wienner munze, der seu uns genzleich verricht und gewert habent. Und umb diselben phenning so hab wir ander unser erbe geledigt von den juden. Es sol auch der vorgenant Altman und sein hausfrawe ver Sweigmuet und ir baider^d erben furbas mit egenantem gue ze Oexdorf allen iren frumen schaffen mit verkaufen und mit verseczen und geben wem si wellen mit unserm guetleichen willen an allen irsal. Daruber durch ein besser sicherhait so seczen wir uns vorgenante ich Weigant und ich Chaloch di Haechel Altman von Waczmanstorf und seiner hausfrawen ver Sweigmueten und ir baider^e erben mit allen unsern erben des egenanten güts ze Oxstorf und alles das das darzü gehört ze scherme und geweren für aller erben ansprach, darzu für alle ansprach als aigens recht ist und des landes gewonhait in Österreich. Nement sew darüber dhainen schaden mit recht an dem egenanten guet, den süll wir in ablegen und loben in das mit unsern trewn an alles gevër. Und sullen auch si denselben schaden dennoch haben auf allem dem guet und wir haben in Österreich. Daz di red also stet und unzebrochen beleib, so geb wir egenante zwen brüder, ich Weigant und ich Chalhoch di Haechel Altman von Waczmanstorf und seiner hausfrawen ver Sweigmueten und ir baider^e erben disen brif versigelt mit unsern baiden insigeln zu ainer staeten sicherhait diser sache. Der wandlung sind gezeugen: herr Helmweich von Chulib, Götfrid von Ainod, di baid mit ir insigel und ander erber leut, den die sache wol kunt ist. Der brief ist geben dacz Sand Polten, nach Christes gepurd uber dreuzehenhundert jar dar nach in dem dreizigistem jar, des suntags vor dem auffert tag.

Source Fulltext: LAMPEL, Urkunden Sanct Pölten (=FRA I, Wien 1981) S. 292-293