Ich Chonrat der Grevsincher purger datz Ens vergich und tün chund allen den di disen brief sehent oder horent lesen, das ein chrieg ist^a gewesen zwischen mir und den erbern herren brobst Hainrichen von Sand Florian und brobst Dietmaren von Sandpolten und ir baider samung umb einen zehent der leit auf drin^b weingerten in der Wochaw die ich ze lehen han von dem erbern herren dem abt von Tegernsee. Derselb chrieg hat als lang gewert, unz das wir nommen^c mit guetlichem willen den erberen herren mein herren hern Jansen von Chunring zu einem schiedman: was er daruber sprech das scholt wir baidenthalb also stet haben; wer es prech,^d das der dem vorgenanten herren vervallen wer hundert phunt phening wienner munz. Do sprach er: seind der zehent in dem tal zwischen den marhen, und ausgezaigt ist, der baider herren ganz und gar wer, möcht er iren zehent nicht abgesagen mit chainem recht; und dar umb hat er es also beschaiden, das ich den vorgenanten herren zehen jar alle jar von den drin^b weingerten ain viertail weins fur den zehent geben sol; wenn aber die zehen jar auß sind, so sol ich oder wer di weingarten inne hat ganzen zehent geben an allen chrieg. Das disew wandlung stet und unzebrochen beleib, han ich gepeten meinen herren hern Jansen von Chunring, das er zu einem sichtigen urchund sein insigil mit sampt dem meinen an disen brief gelegt hat. Diser sach sind gezeug: her Hainreich der Öder, Ru^edolf der richter, Dietmar der Wolfstain, Chunrad der nachrichter und ander biderb leut genueg. Der brief ist geben nach Kristi gepurd dreuzehenhundert jar in dem drew und dreissigistem jar, an sand Thomans tag.^e1

Source Fulltext: LAMPEL, Urkunden Sanct Pölten (=FRA I, Wien 1981) S. 310-311