Ich Dietreich der alt von Weizznberch vergich und tün chunt allen den di den prief an sehent oder horent lesen, die nu lebent und hernach kunftig^a sint, daz ich mit verdachtem muet und mit güten willen und gunst meins suns Dietreich und aller meiner erben, zu der zeit do ich iz wol getuen mocht, hann ledikleich auf geben dem erbern mann Hainreichen dem Fleuzzlehen purger dacz Sannd Polten und seiner hausvrowen ver Geiseln^b und ir baiden erben meinen zehent dacz Prünsleinstorf mit allem nucz und reht, chlain und grozzen versücht und unversücht, das darzu gehört, wie das genant ist, als si den von mir gehabt habent, der auch mein lehen gewesen ist von dem edlen fürsten pischof Albrechten ze Pazzaw, dem ich denselbn zehent han auf geben auf dired, das er in verlihen hat dem egenanten Hainreichen und seiner hausvrowen ver Geiselen und ir baider^c erben ze allem dem reht als ich den gehabt hann, das si allen iren frum ouch furbaz mit demselben zehent schaffen mügen, verkaufen und verseczen und geben wem si wellent mit meinem guetlichem willen an allen iresal; und wil auch ich desselben zehentz ir scherme und gwer sein für alle ansprach, als lehens recht ist und gewonhait in dem land ze Osterreich. Nement si darüber dhainen schaden mit recht an dem vorgenanten zehent ze Prunsleinstorf, den schol ich in ablegen, daz ich in gelobt han^d mit meinen trewn, und sullen si das haben auf allem dem guet das ich und mein erben haben in dem land ze Osterreich. Daz in di red also staet und unzebrochen beleib, daruber so gib ich vorgenanter Dietreich der alt von Weizzenberch disen^e brief versigelt mit meinem insigel zu ainem waren urkund und staeten sicherhait diser sache. Des sint gezeug: Dietreich von Weizzenberch mein sun und herr Alber von Mainberch, di baid mit iren insigeln. Der brief ist geben dacz Sand Polten, nach Christes geburt über dreuzehnhundert jar darnach in dem funf und dreizzigisten^f jar, des nachsten ertags^g nach dem ewenweichtag.

Source Fulltext: LAMPEL, Urkunden Sanct Pölten (=FRA I, Wien 1981) S. 314-315