Ich Cholman von Ramsenbach und vrow Katrei sei^a hausvrow vergehen offenleich an^b disem prief und tuen chunt allen den di in sehent oder hôrent^c lesen, daz wi^er mit gesamter hant und mit aller unser erben gueten willen und gunst, recht und redleich verchauft haben ein halbs lehen, daz do leit datz Heingeinsteten an dem ort ze veld unz^d ze dorf, verschueht und unverschueht,^e dor auf sitzet Herwort der Gruendel und do von man dienet alle jar ein halbs pfunt und acht pfenning wyenner munz an sand Mychels tag, daz unser freiz aigen ist, mit allen den rechten und nuczen als wier iz inn gehabt haben, dem erbern mann maister Petrein pfarrer ze Albrechtsperg umb suben^f pfunt wyenner pfenning, der er uns ganz und gar von seinem aigen guet gewert hat. Und seinen^g auch wi^er des selben guetes sein rechter scherm und gewer fuer all ansprach oder wem er das schaft, als aigens scherms recht und gewonhait ist in dem land ze Osterreich. Und wigetanen schaden er des scherms dor uber næm mit recht oder mit ansprach, mit nahraisen oder swie der schad genant ist den er uns pei sein trewn gesagen mag, den luben wier im gar und gênzleich ab ze legen mit unsern trewen an fuerbot und an all chlag, und schol er daz haben auf unsern trewn und auf alle dev und wi^er haben in dem land ze Osterreich. Und wo wier uns dor an inder vergêzzen,^h so schullen uns nôtten unser gnêdig herren her Jans und her Levtold von Chunring als verr unz wir alles daz volfueeren daz hie vor geschriben ist mit unserm gueten willen. Und daz disev wandlung also stêt beleib und unzeprochen, geb wi^er dem egenanten maister Petrein disen prief versigelt mit meinem vorgenanten Cholman insigel¹ und durch pezzer sicherhait meins vorgenanten herren her Jansen von Chunring² insigel versigelten zu ein gezeug der vorgeschriben sach. Der prief ist gegeben do von Christs gepu^erd ergangen worn dreuzehen hundert jar dornach in dem zwai und vierzgisten jar, in die purificacionis sancte virginis.

Source Fulltext: LAMPEL, Urkunden Sanct Pölten (=FRA I, Wien 1981) S. 343-344