Ich Jans Schirnigkher und ich Elspet sein hausfraw und unser erben und ich Fridreich Syrniker und ich Catrei sein hausfraw und alle unser erben wier verjehen offenwar an disen brief und thun khund allen den die in sehent oder hörent lesen, di nu lebent und hernach khinftig seind, das wier mit wolbedachtem muet und mit gunst und guetem willen aller unser erben und auch mit sambter hand, zu der zeit da wier es wol gethun mechten, recht und redlich hingeben und verkhauft haben unsers rechten onerstorbens freis eigens ein wisen die gelegen ist zu Watzleinsdorf Frydreichen dem Roschtauscher^a burger zu Sandt Pölten und Engelein seiner hausfrawen und allen iren erben umb sechzig und umb 6 ß d‚ der wier gar und ganzlich gericht und gewert sein. Wier haben inn auch die vorgnante wisen verkhauft und aingeantwurdt mit alle dew und darzu gehort, versuecht und unversuecht, wie das genant sei, mit allen nutzn als wier es inne gehabt haben, ze rechtem aigen ewigclich ze besitzen, und sollen damit iren frumen schaffen mit versetzen, verkhaufen und geben wem sew wellent, on alle irrung. Wier sein auch der vorgenanten wiß und alles was darzu gehort, ir recht scherm und gwer fur alle ansprach, als aigens recht und des landes recht ist in Osterreich. Welichen schaden sew des nemen^b mit recht, den sollen wir in ablegen an khrieg und an alle wider red; und sollen das haben auf uns und auf allem unserm guet das wier haben in dem land ze Österreich oder wo wier es haben, wier sein lembtig oder tod. Das in das alles stät und unzerprochen bleib, daruber so geben wier inn disen brief zu ainem offen sichtigen urkhund der warheit versigelten mit meines vorgenanten Jansen des Schyrnikhr und mit mein vorgemelts Fridreichs seins bruders anhangunden insigeln. Des sint gezeugen: Petter der Wurfl, Vlrich in dem Hochen haus‚ Niclaus der Prunner. Jacob der Leymbecher burger ze Sandt Pölten. Geben nach Christi geburd 1352^ten jar, an sontag Letare in der vasten.

Source Fulltext: LAMPEL, Urkunden Sanct Pölten (=FRA I, Wien 1981) S. 434