Ich Dietreich der Guefinch^a und Anna mein hausfraw und ich Hainrich der Neydekcher und ich Syman und Hartel mein bruder des Viviants^b süne und ich Chunigund maister Chunradts witibe und all unser erben und nachkomen wir verjehen und tun chund offenbar an dem briefe allen den die in sehent oder horent lesen, das wir mit guetem willen und verdachtem müt und nach unser^c frewnd rat und zu der zeit da wir es wol getun mochten, geben und bestät haben dem spital zu Sand Polten mit dem brief zwai phund wienner phenning ewigs gelts auf der wisen ze Mos‚ die da haisset die Vtzinn, diec unser besunder und nachster frewnd Nicla der Vtze burger datz Sand Polten und Katrey sein hausfraw dem egenanten spital mit irem brief ewigklichen geben und bestëtt habent. Wir sullen auch die egenanten zwai phunt wienner phenning alle jar geben und raichen wer ie zu den zeiten spitalmaister ist datz Sand Polten unverzogenlichen ain phund zu sand Gorigentag und ain phund ze sand Merteinstag; und der selben pfennig sol der spitalmaister^d raihen und geben alle kotemmer mit einer gewissen den siechen die in dem egenanten spital sind ain halbes phund und in dar umb chaufen das si desterpaß ze essen und ze trinkchen haben. Geschäch aber des nicht und das ein spitalmaister^e daran saumig wär und des uber wart wurd mit leuten den ze gelauben war, so sullen wir und unser erben die egenanten zwai phund gelts inne haben als lang unz das alles widertan wirt und geben den siehen die in dem egenanten spital sind, das man vor versessen und versaumpt hat. Wir verjehen auch, ob wir die egenanten zwai phunt wienner phening alle jar dem spitalmaister dacz Sandpolten nicht engeben ze ider zeit unverzogenlichen als vor geschriben stet, so schol aller der schad darauf gen der ze recht auf purkrecht get und als gewondlich und recht ist in dem land ze Osterrich. Es ist auch der egenanten wisen rechter purkherr der erberg herr brobst Dietmar datz Sand Polten, dem wir alle jar davon raichen sullen ie zu sand Michels tag zwenn wienner phenning ze purkrecht. Wir haben auch vollen gewalt die egenanten zwai phund wienner phenning gelts ab ze losen und ze kaufen von dem spitalmaister datz Sand Polten alle jar ie das phund gelts ze seiner zeit, als egeschriben stet, vor vierzehen tagen umb neun phunt wienner phenning; und ob das geschicht, so sol dann wer ze den zeiten spitalmaister ist die selben achzehen phund phennig dem egenanten spital dacz Sand Polten und den siehen an legen und chaufen darumb nach rat und mit einer gewissen, das in nuczlich und güt sei. Das disew taiding also stet und unzeprochen beleiben, daruber zu einer ewigen urchund geben wir dem egenanten spital, disen brief mit des erbergen herrn brobst Dietmar ze Sand Polten insigel und mit unser egenanter Heynrichs des Neydekker,¹ Diethtreichs des Guefinch,² Symons³ und Hertleins des Viviants süne anhangunden insigelen versigelt; und wann ich egenante Chunigund maister Chunradts witibe aigens insigel nicht enhan, verpind ich mich mit meinen trewn under des vorgenanten Hainrichs des Neydeker insigel alles das stat ze laisten und ze haben^f das oben an disem brief geschriben stet. Diser taiding sind gezeugen: her Hans von Tirnstain chorherr und zue den zeiten spitalmaister ze Sand Polten und Peter der Wurfel ze den zeiten richter und Ulrich in dem Hochenhaws, Nicla der Prunner, Chunrad pei dem tor purger da selben und ander erberg leute, den wol ze gelauben ist. Der brief ist geben nach Christi gepurd dreuzehenhundert jar darnach in dem zwai und funfzigisten jar, an sand Gorgen tag.

Source Fulltext: LAMPEL, Urkunden Sanct Pölten (=FRA I, Wien 1981) S. 435-436