Ich Weikchart von Toppel hofrichter in Österreich vergich das für mich kom in das hoftaiding, do ich saz an ainem rechten, der erwirdig geistlich herr probst Dietmar von Sand Polten und legt für mit varsprechen, er und sein goczhaus hieten ainen aigen hof der gelegen wër ze Sicherpach,^a do aus wer im verchauft ain tag werch wismades an herren hant, und hiet er das funden in Hainrich gewalt des Chlingprunner, und hiet er auch denselben geladen mit vron poten für recht, di wis ze verantwurten vor Seifriden dem Hagnawer, der da ze richter wart geseczt und geben. Do verantwurt Hainreich der Chlingenprunner der wis nicht als er^b ze den tagen geladen was und chom auch für recht nicht. Do wart dem probst und dem convent ertailt, di wis solt^c pilleich ze dem hof gehören, als von alter herchömen ist.^d Do chom Hainreich der Chlingenprunner fur mein herrn den herzogen und jach, di wis wer sein. Do gab in mein herr der herzog paiden ain tag dem probst und auch dem Chlingenprunner in das hoftaiding auf ain recht. Do chom der probst herr Dietmar für recht mit^e seim urchund. Aber Hainreich der Chlingenprunner der chom nicht für recht. Do pat aber der probst aber mit varsprechen vragen, wazz nu recht wer? Do ertailten im die lantherren und geviel im auch mit vrag und mit urtail, seid inn mein herr der herzog ain tag geben hiet in das hoftaiding und Hainreich der Chlingnprunner den tag nicht gesücht hiet und für recht nich^f chömen wïr: es solt den vorgenanten probst herrn Dietmaren und seinem goczhaus di wis beleiben und vervallen sein zu seinem hof ze Sicherpach,^g alz es von alter herchomen wër. Mit urchund des briefs geben ze Wienn‚ des phinztagsvor sand Michels tag, anno domini MCCC quinquagesimo tercio.

Source Fulltext: LAMPEL, Urkunden Sanct Pölten (=FRA I, Wien 1981) S. 445-446