Ich Vlreich von Eppendorf und ich Kathrey sein hausvrowe und all unser eriben wier verjehen offenlich an disem brief, das wier mit aller unser eriben guetem willen, ze der zeit do wier es wol getuen mochten, verchouft haben unsers rechten aigens zehen schilling wienner phenning geltes dem pharrer zu Stainfeld hern Vlreichen und allen seinen nachchoemen auf sand Goerigen alter zu einer ewigen mezz, zu sprechen alle wochen an dem mitichen; deu egenanteu^a gult hat di gemain chouft umb drewzehen phunt wiennaer phenning, der ich und mein egenante hausvrowe und all unser eriben genzleich gewert sein; und sind di gult gelegen pei Weizzenpach auf dem hof gehaizzen zu Guemtal, und dient an sand Michels tag zwen und siben schilling phening und ze weinachten vier und zwainzig fuer sechs huenr und ze phingsten vier und sechzig fuer acht ches. Wier setzen auch uns ich egenanter Vlreich von Eppendorf und ich Kathrey sein hawsvrowe und all unser eriben dem egenanten hern Vlreichen pharrer ze Stainfeld und allen seinen nachchoemen des egenanten guets zu Guemtal zu scherm und zu gewern fuer all ansprach, als aigens recht und des landes recht ist in Oesterrich. Nem her Vlreich pharrer ze Stainfeld und sein nachchoemen an dem vorgenanten guet icht schaden mit recht, den schull wier im ablegen und widerchern. Tet wier des nicht, das schol er oder sein nachchoemen haben auf alle dem guet daz wier haben in Oesterrich und in Steyr an allen ierrsal. Und daru^eber gib ich Vlreich von Eppendorf hern Vlreich dem pharrer ze Stainfeld und allen seinen nachchoemen den brief versigelten mit Pernnolts insigel des Chlingenfuerter zu den zeiten puerkgraf zu Ochsenbuerch, wann ich aigens insigels nicht han, und mit Petreins insigel von Chaumperg meins swagers. Der brief ist geben nach Christi gepu^erd dreuzehen hundert jar darnach in dem drew und fumfzigistem jar, an sand Vrbans tag.

Source Fulltext: LAMPEL, Urkunden Sanct Pölten (=FRA I, Wien 1981) S. 442-443