Ich Wernhart der druchsetz von Reichenstorf und Agnes sein hausfraw und all unser erben wir verjehen und tuen chund offenlich allen den die nu lebent und hernach chünftig sind, das ich verchauft han meins aigenshaften guets funf schilling und vierzehen phenning gelts das gelegen ist ze Weyssenkirhen und ze Eberharczstorf, her^a Albrechten von Chappellen und Heinreichen von Meinhartzstorf ze den zeiten des Neytperger amman umb neun phunt wienner phenning, der ich recht und redlich verricht und gewert pin. Ich pin auch des aigens ir rechter gewer und scherm fur all ansprach, als aigens recht ist in dem land ze Osterreich; und gieng in daran icht ab mit dem recht, das sullen si haben auf mir und auf allem guet das ich han in dem lande ze Ostereich oder wo ichs han, ich sei lebentig oder tode. Und der wandlung sind zeugen: der erber ritter her Jorig von Goczeinstorf und Ulreich der Gnewzz von Mozz und ander erber leut. Das der chauf und die wandlung furbas stet und unzebrochen beleib, so^b gib ich in den brief versiglt mit meinem insigill und mit des erbern riter insigil hern Jorgen von Goczeinstorf und mit des erbern chnechts insigill Vlreichs des Gnewzz von Moz, die der sach zeugen sind mit iren insigilen. Der brief ist geben nach Christi gebürde dreuzehenhundert jar darnach in dem vier und funfzigisten, an dem Prehentag.

Source Fulltext: LAMPEL, Urkunden Sanct Pölten (=FRA I, Wien 1981) S. 446-447