Ich Chunrat der Pielacher und ich Geisel sein hausfraw und unser baider erben vergehen offenlich und tuen chunt alle den die den brief sehent, lesent oder hornt lesen, die nu leben oder hernach chunftig sind, das wir mit wolverdachtem müt und gunst aller unser erben, z'der zeit do wir iz wol getuen mochten, verchauft haben unsers rechten aigen an sechzehen phenning zwai phunt gelt gelegen in der Edlicz, an sechs vierzehen schilling auf ainem lechen und auf ainer hofstat an ainem funzk², dem erbern ritter herrn Wulfing dem Veirtager und vrawn Chunczen seiner hausfrawn und irr paider erben umb dreizzig phunt wienner phenning, der wir ganz und gar verricht und gewert sein. Wir seczen uns auch ich vorgenanter Chunrat der Pielacher und ich Geisel sein hausvraw und all unser erben des vorgenanten guet ze scherem und gewer fur all ansprach, als aigens recht ist und des landes recht in Osterreich. Nemen sew awer an dem vorgenanten guet dhainen schaden mit recht, den vorgenant herr Wulfinch der Veirtager oder sein hausvrow vrou Chuncz oder ir baider erben gesagen möchten bei irn trewn, den lub wir in abzelegen; und sullen sew das haben auf all dem gütt das wir haben in dem lande ze Osterreich, wir sein lebentig oder tode. Das di red stet und unzebrochen beleib, doruber gib ich vorgenanter Chunrat der Pielacher und ich Geisel sein hausvrow und unser erben dem vorgenanten herrn Wulfing dem Veirtager und seiner hausvrown vraw Chunczen und ir paider erben den brief versiglt mit meinem insigl und mit meins swager insigel Gorgen von Uettendorf. Der sach ist zeug Ott der Pomer mit seinem insigel. Der brief ist geben nach Christi gepurt dreuzehenhundert jarr darnach in dem funft und funfzigistem jar, an sand Gorgen tag.

Source Fulltext: LAMPEL, Urkunden Sanct Pölten (=FRA I, Wien 1981) S. 453