Ich Cunrat von Soß und ich Herman von Soß und all unser erben verjechen mit urkhund des briefs allen den die inn sechent oder horent lesen, das wier unserm vettern herrn Otten von Soß ze khaufen haben gegeben ain guet datz Muemaw, das gelegen ist in Poltinger phar, umb achzehen phund phening; und hat er uns fur di vorgenanten achzehen phund phennig geben ein guet auf dem Khranibitperg, das gelegen ist in Hyrber phar, und soll auch dasselbig guet in den gluben und pinten sein, als unser tailbrief sait‚ den uns unser vatter geben hat, dem got genad. Und wen uns unser vor genanter vetter^a her Ott von Soß geit zehen schilling gelts auf dem Neydegkh, so sol das vor genant guet auf dem Khraniwetperg sein ledigs guet sein, und soll da allen sein frum mit schaffen, wie inn aller pest fuegt, mit unserm guetleichem willen. Das di red furpass stat und unzeprochen bleib, daruber so geb wier inn den brief versigelten mit unsern anhangunden insigeln ze eim warem urkhund der sach. Und des ist gezeug unser vetter her Ott von Soß mit sein anhangunden insigl, dem di sach wol khund und gewissen ist. Der brief ist geben nach Christi gepurd 1355ten jar, des sontags an sand Luceyn tag.

Source Fulltext: LAMPEL, Urkunden Sanct Pölten (=FRA I, Wien 1981) S. 458