Dietricus miseracione divina abbas monasterii Chotwicensis et Chunradus decanus Chremensis Pataviensis diocesis a venerabili in Christo patre et domino nostro domino Gotfrido episcopo Pataviensi in causa infra scripta iudices delegati discretis viris domino Vlrico in Stayn et domino Vdalrico in Radendorf ecclesiarum plebanis salutem in domino. Noverites nos litteras reverendi in Christo patris et domini nostri domini Gotfridi episcopi Pataviensis recepisse per omnia in hec verba:¹ Gotfridus dei gracia episcopus Pataviensis venerabili in Christo Districo abbati monasterii Chotwicensis ordinis sancti Benedicti ac dilecto nobis in Cristo Chunrado decano Chremensi nostre diocesis salutem et sinceram in domino caritatem. Sua nobis, dilecti in Christo, etc. ut supra. Datum Chremse, Severi episcopi, anno domini millesimo CCC quinquagesimo septimo. Volentes igitur mandatum nobis iniunctum humiliter exequi, ut tenemur, discrecioni vestre in virtute sancte obediencie et sub pena excommunicacionis firmiter iniungimus et mandamus, quatenus locum Leuben vel alibi ac habitacionem honorabilis viri et religiosi domini . . abbatis in Tegernse ordinis sancti Benedicti personaliter accedentes eundem dominum abbatem suo et ecclesie sue nomine peremptorie citetis uno edicto pro tribus, ut proxima feria seconda post octavas epiphanye Chremse^a in curia decanali ibidem compareat prepositis in Sancto Ypolito et in Sancto Floriano antedictis super decimis in Bachonia situatis, ut premittitur, de iusticia responsurus; alioquin ipsius absencia non obstante in dicto negocio, quantum de iure poterimus, procedemus. In signum vero facte citacionis sigilla vestra presentibus imprimatis. Datum Chremse, die sancti Severini, anno quo supra.²

Source Fulltext: LAMPEL, Urkunden Sanct Pölten (=FRA I, Wien 1981) S. 479