Wir U^olreich von gotes gnaden ze den Zeiten probst und ich Christoff techant und wir . . der convent gemainleich ze sand Polten Chorherren sand Augustins orden Pazzower bistu^oms verjehen offenlich mit disem brief fûr uns und unser nachkomen, wan der durleuchtist fürst unser gnêdiger lieber herre herzog Ru^odolff zu O^esterreich ze Steyr und ze Kërnden etc. durch got und durch unserr bet willen daz kirchlehen ze Recz vor der stat‚ das sein was, mit uns hat auzgewechselt, darumb daz uns dieselbe kirch ze Retz aller pest fugte und daz wir vor ander gült und zehent in derselben pharr hatten, haben wir demselben unserm herren dem herzogen, seinen pru^edern und erben da für gegeben und geben mit disern brief in rechtes wechseis weis mit gunst und urlaub des erwirdigen unsers lieben herren hern Go^etfrids bischofs ze Pazzow die lehenschaft der kirchen ze Sand Zenen bei Hochenekk und der kirchen ze Karlsteten die uns und unser goczhaus angeho^erten, und haben davon uns und unser nachkomen verzigen und verzeihen ouch zu des obgenanten unsers herren des herzogen, seiner bru^eder und erben handen der lehenschaft an den obgenanten chirchen ze Sand Zenen und ze Karlsteten. Ouch sein wir und unser goczhaus des egenanten unsers herren des herzogen seiner bru^eder und erben daruber recht gewern und scherm für all ansprach. Und des ze urchund geben wir disen brief versigelten mit unsern und des obgenanten unsers herren von Pazzow insigeln.¹ Und wir Go^etfrid von gotes gnaden pischof ze Pazzow bechennen, daz wir den egenanten Wechsel bestætet haben mit unserm insigel gehenkt an disen brief, der geben ist ze Wienn, an sant Marie Magdalen tag, nach Christs gepurd dreuzehen hundert jar darnach in dem ain und sechzigistem jar.²

Source Fulltext: LAMPEL, Urkunden Sanct Pölten (=FRA I, Wien 1981) S. 521-522