Wier Ru^edolf der vierd von gotes genaden erzherzog ze Oestereich, ze Steyer und ze Kërnden, herr ze Chrain auf der Winndischen marich und ze Portenawe, graf ze Habspuerch ze Phuertt^a und ze Kybuerg, marichgraf ze Purgawe und lantgraf in^b Elsazze bechennen offenleichen, wand di magenchraft goetleicher fuersichtichait^c weltlichen^d gewalt mit furstleicher wierdichait empholichen und gegeben hat ausgenomen laeuten, di got dar zue geordent hat, darumb zimt wol fuerstleichem adel ze tragen ein gedultig^e mitleidunde^f herz allen versereten und beswerten menschen und sunderleichen iern getrewn undertanen, doch aller maist geistleichen lëuten, di in gotes dienst mit strenger uebung sich arbaitent andæchtichleichen ze allen zeiten. Dis ist das wier nach angeborner natur fuerstleicher miltichait mitleidund sein den erbærn geistleichen unsern getrewn andæchtigen . . dem probst und . . dem convent der chorherren des gotshauses und des capitels ze Sand Ypoliten, di laider in den naechsten jaren von der prunst wegen di an ierm gotshaus und an iern hæusern geschehen ist grozzen verderblichen schaden genomen habent, und tuen chunt, das di selben . . der probst und die chorherren von Sand Ypoliten, an der stat des jares und des tages als diser prief gegeben ist, fuer uns choemen sind und uns beweiset haben mit soelicher erbærr chuntschaft, der wier gelaubt haben, daz ier vorvodern auf der selben stift und auch si gehabt habent von weilnt^g dem allerdurchlauchtigistem unserm herren und enen dem Roemischen chuenig Albrecht herzogen und herren zu den zeiten der vorgenanten unser landen ein hantfest versigelt mit seinem grozzem anhangundem insigel,³ da mit in verhenget und geben wær soelich freihait und genad, das si iern traid, iern wein und allerlai chost, swes si in ier gotshaus bedoerften, fueren und vertigen sollten, als sew auch von alter getan habent, da selbs hin gen Sand Poelten^h in ier chloster an maut, ane zol und an alle ierrung, und das in der selb ier prief nu mit ettleichen priefen di si heten gehabt und ierr chirichen schatz verprunnen sei, und habent uns gepeten, das wier in und iern nachchoemen ewichleichen di selben freihait und genad, seind das si ier alt prief verlorn habent, geruechen ze geben von newn dingen, als si di unz her pracht habent, und daz wier in di mit hantfest unserr priefen bestæten geruechen ewichleich und bewærn. Daz haben wier getan und haben lauterleich durich got, durch aller unserr vordern und unserr seln hailes willen fuer uns und unserⁱ prueder, der aller wier als der eltist under in vollen gewalt^j und ganzen gewalt haben, und fuer unser aller eriben dem vorgenanten gotshaus ze Sand Poelten^k. . dem probst, . . den chorherren und . . dem capitel daselbs und allen iern nachchoemen ewichleichen nach gueter vorbetrachtung mit rechter wizzen gegeben ewichleichen und geben mit disem prief recht und redleichen di egenanten freihait und genad, also das si iern traid, wein und ander ier nuecz und dienst, zins und zehent und gemainlichen swas si in ier haus beduerfen an gevær, als das mit alter gewonhait her choemen ist, fuern und vertigen schuellen und muegen in daz egenant ier chloster. Dar umb enphelichen und gepieten wier in dem nammen als da vor fuer uns und fuer all unser eriben ewichleichen allen unsern gegenwuertigen und chuenftigen mautærn, zollnærn und amptleuten, das si das vorgenant gotshaus . . den probst und di chorherrn von Sand Poelten^l und allen iern nachkomen ewichleich beleiben lazzen pei den vorgeschriben freihaiten und genaden di wier in gegeben haben und si dar an nicht ierren noch da widertuen oder iemand tuen lazzen in dehainen weg; wer aber da wider tæt, den schuellen und wellen wier und unser eriben darumb pezzern und straffen an leib und an guet. Diser sach sind gezeugen di erbierdigen unser lieben freunt: her Ortolf erzbischof ze Salczbuerch legat des stuels ze Rom, her Paul pischof ze Freising,^m her Goetfrid pischof ze Pazzawe, her Johans pischof ze Gurk unser chanzlær, pischof U^elreich von Sekkowe, pischof Peter von Lavent und pischof Fridreich von Chiemse, und di edeln unser lieben oechaim graf Albrecht von Goercz phallenzgraf in Chærnden, graf Meinhart von Goercz und von Tyrol sein prueder und graf Ott von Ortenbuerch, und di edeln unser getrewn lieben graf Uelrich und graf Herman prueder von Cyli, graf Johanns von Phannberch, graf Yban von Pernstain,⁴ Eberhart von Waltse,ⁿ Fridreich von Oufenstain unser houptman in Chernden und Chuenrad von Oufenstain unser houptman in Chrain und auf der Marich, Fridreich von Walsse von Græcz, Hainreich und Fridreich von Walsse von Drosendorf, Stephan von Meissawe obrister marschalich in Oesterreich, Leutold von Stadekk unser lantmarschalich in Oesterreich, Jans der Tuers von Rauhenekk, Hainreich von Rauhenstain, Alber von Puechhaim, Wernhart von Meissawe, Hainreich von Liechtenstein von Nicoltspuerch, Mertt der Stuechss von Trautmanstorf, U^elreich von Stubenberch, Chol von Sældenhofen, Hainreich von Hakenberch, Pilgreim der Stræwn, Hainreich von Rappach unser hofmaister, Jans der Losperger^o unser chamermaister, Wilhalm der schenkch von Liebenberch unser speismaister, Wernhart der schenkch unser vorstmaister und Albrecht der schenkch unser chelrmaister und ander erbær lëut genueg. Und dar u^eber ze uerchuend geben wier in disen prief versigelten mit unserm grozzen anhangundem insigel. Der prief ist geben ze Wienn, an unser vrowen abent ze der chuendung, nach Christi gepu^erd tausent dreuhundert jar dar nach in dem zwai und sechzigistem jar, unsers alters in dem drew und zwainzigistem und unsers gewalts in dem vierden jar.||
† Wier der vorgenant herzog Ru^edolf sterkchen disen prief mit dirr underschrift unser selbs hant. †⁵

Source Fulltext: LAMPEL, Urkunden Sanct Pölten (=FRA I, Wien 1981) S. 544-546