Ich Janns von Mainberch vergich offnlich an dem brief allen den die in sehent oder hornt lesen, das ich den zehent dacz Obrechtsperg, di zwai tail getraid zehent und wein zehent chlain und grossen und alle new reut darzü di do sint oder noch werdent und was darzue gehört, und der mir recht und redlichen ledig warden ist, von genaden gelihen hann Mairman und Jorgen seinen pruder und allen iren erben, die des Hasenpekchen ennichel sind. Wer aber das si an erben abgiengen mit dem tod, so han ich dieselben gueter allew die vorbenant sind verlihen^a Niclasen dem Juden aus der Wochaw und allen seinen erben; und darumb mir di egenanten zwenn brueder geben habent zwainzich phunt wienner phenning, also das sew allen iren frumen damit schaffen mugen mit verchaufen, verseczen an alle irrung. Und pin auch ich egenanter Janns Mainberger^b des vorgenanten zehents ir^c herr und ir scherm und gwer für alle ansprach als lehens recht ist und des landes recht in Österreich. Und daruber ze einer pessern sicherhait so gib ich inn den brief versiglt mit mein und mit¹ meins sweher insigil herrn Andres des Hauser² der der sach gezeug ist mit seinem insigil. Der brief ist geben nach Kristi gepurd dreuzehenhundert jarr darnach in dem zwai und sechzigistem jarr, des mittichens an sand Veits tag.

Source Fulltext: LAMPEL, Urkunden Sanct Pölten (=FRA I, Wien 1981) S. 548-549