Ich Ott der Moerl, ich Chunigunt sein hausvrowe, ich Ortolf der Moerl sein sun, ich Stephan von Embreinstorf, ich Ameye^a desselben Stephans hausvrowe und all unser eriben vergehen und tuen chunt allen den di den brief an sehent oder hoernt lesen, die nu lebent und hernach chuenftig sind, das wier mit gueter vorbetrachtung, mit guetlichem willen, mit gesampter hant, ze der zeit da wier es mit recht wol getuen mochten, recht und redlich verchoueft haben zwelif emmer weins perchrechtes gelegen an dem Stadelperg und fuemf viertail weingarten da selb gelegen und vierzig wienner phenning geltes gelegen datz den Stainprechen^b auf ainer hofstat und fumf metzen habern geltes marichfueter gelegen an dem Puechschachen und ain halbs phunt wienner phenning geltes gelegen auf ainem hof an^c dem Guetenekk, und das wier alles ze puerkchrecht gehabt haben von dem gotzhaus ze Sand Poelten und auch dem selben gotzhaus jerlich davon gedient haben ain halbs phunt und achthalben wiennaer^d phenning ze rechtem puerkchrecht: dew vorgenannten gueter und guelt mit allen den nuetzen und rechten als wier di unversprochenlich in pu^erchrechtes gewer herpracht haben, haben wier verchouft und geben umb neun und zwainzigch phunt wienner phenning und umb ain halbs phunt phenning, der wier aller genzlich verricht und gewert sein, dem erwierdigen und geistlichen herren hern Vlreichen dem Veyrtager probst des gotzhaus datz Sand Poelten und dem convent gemainlich daselbs fuerbas ledichlich und freilich ze haben und allen iern frumen da mit ze schaffen, als in und ierm gotzhaus das^e wol choem und füeg an allen chrieg und ierrsal. Auch sein wier der obgenanten guelt und gueter ier recht gewer und scherm fuer alle ansprach, als pu^erchrechtes recht ist und des landes recht ze Oesterreich. Wer aber das in fuerbas dar an icht ab gieng mit recht, oder ob sew icht chrieg oder ansprach dar an gewunnen, von wem das wêr, das schullen wier in alles ausrichten ablegen und widercheren an all ier mue und auch an allen iern schaden; und schullen si das haben auf uns unverschaidenlich und auf allem dem guet das wier haben in dem land ze Oesterreich oder wo wier das haben, wier sein lebentig oder tode. Des ze uerchuend geb wier den brief versigelt mit mein obgenanten Otten des Moerleins und mit mein Ortolfs des Moerleins und mit mein Stephans von Embrestorf insigeln. Der sache sind auch zeug Seifrid der Sicherpekch und VIreich der Chluppinger mit iern insigeln durch unser vleizzigen pet willen, in an schaden. Geben nach Christes gepu^erd dreuzehen hundert jar darnach in dem fumf und sechzigistem jar, an unser vrowen tag ze der liechtmezze.

Source Fulltext: LAMPEL, Urkunden Sanct Pölten (=FRA I, Wien 1981) S. 608-609